Собранието вчера во рамките на 104-та седница ја продолжи амандманската расправа по Предлог - законот за работни односи.
Од поднесените околу 90 амандмани министерот за труд и социјална политика Стевчо Јакимовски прифати десетина. Расправата по преостанатите амандмани продолжува вчера.
На седницата Јакимовски најпрво го отфрли амандманот со кој се предлагаше основицата за пресметување на испратнината во случај на раскинување на договорот за вработување од деловни причини да биде платата во изминатите шест месеци пред отказот заедно со придонесите што на работникот му се исплаќаат.
Тој образложи дека амандманот не го прифаќа поради тоа што е констатирано оти повеќето фирми на своите работници не им ги исплаќале придонесите, додека во повеќето случаи нето платите биле редовно исплаќани.
По дискусијата на пратеникот Жарко Караџовски од ВМРО-НП, кој напомена дека во членот 97 каде се уредува ова прашање, не се прецизира дека станува збор за исплатена плата во изминатите шест месеци пред отказот, министерот Јакимовски го прифати амандманот.
Собранието не го прифати амандманот со кој се бараше бројот на исплатени плати во случај работодавецот поради деловни причини да го раскине договорот со работникот, кој има над 25 години работен стаж, да изнесува девет, наместо шест плати.
Пратеничката од ВМРО-ДПМНЕ Силвана Бонева, која беше еден од предлагачите на амандманот, во своето образложение истакна оти решението содржано во предлогот е контрапродуктивно, бидејќи со него се врши намалување на ова право на работниците во услови кога во Македонија има голема невработеност.
Собранието не го прифати ниту амандманот поднесе од Комисијата за здравство, кој го образложи Кире Гештаковски од СДСМ. Тој појасни дека досегашното законско решение предвидуваше за боледувањето до 60 дена работникот да биде исплатен од работодавачот, а со новото законско решение овој рок се намалува на 21 ден. Тоа значи, појаснува Гештаковски, дека работодавачот ќе го исплати работникот за периодот од 21 ден, додека останатите 39 дена трошоците ќе ги сноси Фондот за здравствено осигурување. "Ова е сосема неоправдано. Сите сме свесни во каква финансиска состојба се наоѓа Фондот за здравствено осигурување", додаде Гештаковски. Предлогот е половина од трошоците, односно 30 дена од боледувањето да ги сноси работодавачот, а останите 30 Фондот.
Министерот Јакимовски му одговори дека при спроведувањето на овие реформи секој мора да го понесе товарот на работењето и работниците и работодавачите и државата. "За дефицитот во Фондот многу малку влијаат боледувањата, тука поголем фактор се други трошоци. Министерството за здравство заедно со Фондот мораат да направат сериозни зафати и во насока на намалување на злоупотребите и во насока на намалување на трошоците", одговори министерот Јакимовски. Тој додаде дека ова решение мора да претставува баланс меѓу работодавачот, работникот и Фондот за здравствено осигурување.
Пратеникот Ѓорѓи Оровчанец од ВМРО-НП смета дека со ова решение се прави обид за прикривање на нерегуларностите кои постојат во целиот систем и додаде оти тоа ќе предизвика голема штета во земјата.
Собранието не го прифати амандманот поднесен од пратеничката Каролина Ристова, кој се однесува на членот 164 каде се регулира заштита за време на бременост и родителство во врска со ноќна и прекувремена работа. Ристова побара во членот наместо само мајката да биде вклучен и таткото, во однос на тоа дека родител со дете од една до три години може да биде повикан на ноќна и прекувремена работа само со негова претходна согласност.
Поддршка на амандманот му дадоа пратеничките Лилјана Поповска од ЛДП и Теута Арифи од ДУИ, како и лидерот на ЛП Стојан Андов.
"Со овој амандман ќе се изедначи третманот на половите во сферата на родителството затоа што и двајцата родители имаат еднакви права во домот и за грижата на децата", рече Поповска.