Македонија е "слаба точка" за Холанѓаните и Холандија ќе продолжи да и помага на земјата во спроведувањето на реформите потребни за евроатлантските интеграции, изјави холандскиот министер за надворшни работи Бернард Бот по средбата во Скопје со шефот на македонската диполоматија Илинка Митрева.
Бот истакна дека Холандија целосно ги поддржува амбициите на Македонија во однос на членството во НАТО и Европската унија. На заедничката прес-конференција Митрева нагласи оти на средбата добила потврда за холандската поддршка за интеграцијата на Македонија во ЕУ и НАТО, што во моментов е од особено значење со оглед на тоа што кон крајот на годинава Македонија очекува позитивно мислење од Европската комисија за нејзината апликација за членство.
На средбата станало збор и за состојбите во ЕУ по отфрлањето на европскиот устав на референдумите во Холандија и во Франција, при што Митрева добила уверување дека резултатите од референдумот нема да влијаат врз интегрирањето во Унија на земјите од процесот за стабилизација и асоцијација.
"Очекуваме на нашиот пат кон ЕУ да бидеме вреднувани само врз основа на критериумите од Копенхаген. За побрзо остварување на македонските заложби од големо значење е можноста за користење на холандска експертска помош и соработка особено на делот во правосудството и внатрешни работи", рече Митрева.
Министерот Бот потенцира дека отфрлањето на уставот на референдумот во Холандија нема да влијае врз интегративните процеси во Унијата.
"Нема да отстапиме од нашите обврски и ветувања и во тој дух ја поддржуваме Македонија во однос на започнување преговори за членство во ЕУ", рече Бот. Тој уште додаде дека пред почнувањето на преговорите потребно е да се почека оценката на Европската комисија која треба да биде дадена некаде во октомври или ноември, по што ќе се процени дали Македонија ги исполнува поставените барања.
"Никој не треба да има лажни надежи во однос на тоа како се спроведуваат преговорите. Веќе нема да определуваме конечни датуми за завршување на преговорите затоа што верувам дека тие треба да траат онолку колку што е потребно да се оцени дали земјата навистина ги исполнува барањата кои што се поставени пред неа", нагласи холандскиот министер за надворешни работи.
Двајцата министри разговарале и за можноста за либерализирање на визниот режим. Митрева потсети дека за време на холандското претседателство со ЕУ, Холандија покренала иницијатива за почнување дијалог меѓу Европската комисија и Македонија и изрази очекување дека оваа иницијатива која потоа беше поддржана и од луксембуршкото претседателство ќе продолжи со што на македонските граѓани ќе им биде олеснето патувањето во земјите од Европската унија.
Министерот Бот изрази надеж дека пред посетата на премиерот Владо Бучковски на Холандија закажана за октомври годинава ќе биде ратификуван договорот за реадмисија со што ќе биде олеснето и прашањето за визите. На средбата Митрева на Бот му се заблагодарила за најновиот грант во износ од 6, 3 милиони евра што холандскаста Влада и го даде на Македонија.
"Наша задача во иднина ќе биде Холандија од еден од најголемите донатори во Македонија да стане еден од најголемите инвеститори во земјата", рече шефот на македонската дипломатија Илинка Митрева.