Македонскиот премиер Владо Бучковски, кој од вчера учествува на Економскиот форум "Кран Монтана" во Загреб, денеска треба да се обрати пред учесниците на собирот .
Според најавите, обраќањето на Бучковски ќе биде посветено на интеграцијата на Република Македонија во ЕУ и очекувањата до крајот на годината земјата да добие статус на кандидат за членство во ЕУ, а до 2010 година да стане полноправен член од европското семејство.
Во Загреб се очекува денеска да допатува и македонскиот министер за економија Фатмир Бесими, кој на Форумот треба да говори за економската соработка на Македонија со останатите земји.
На отворањето на Форумот, хрватскиот премиер Иво Санадер вчера истакна дека ЕУ покажала дека води сметка за секој дел на континентот, па така и за регионот на Југоисточна Европа.
"На проектот за влез во ЕУ треба долго да се работи, но тоа се исплати", нагласи Санадер, изразувајќи надеж дека Македонија, која неодамна ги поднесе одговорите на Европрашалникот, наскоро ќе добие позитивен одговор од ЕУ и оти ќе ги започне преговорите за влез во европското семејството.
Премиерот Бучковски во своето кусо обраќање до учесниците на Форумот посочи на неопходноста од заеднички регионални проекти што ќе бидат финансирани од ЕУ.
Како што јави специјалниот известувач на МИА од Загреб, на свеченото отворање, меѓу другите, говореа и претседавачот на Форумот Жан Пол Картерон и српскиот вицепремиер Мирољуб Лабус. Иако најавени, на отворањето не се појавија премиерите на Црна Гора и на Босна и Херцеговина, Мило Гукановиќ и Аднан Терзиќ.
На Економскиот форум "Кран Монтана", кој за прв пат се одржува во земја од балканскиот регион, учествуваат шефови и членови на влади на земјите од регионот на Југоисточна Европа и ЕУ, бизнисмени од дваесетина држави и претставници на повеќе меѓународни финансиски институции.
Главни теми на собирот се проширувањето на Европската унија, состојбите во стопанствата, стабилноста во регионот, унапредувањето на демократијата, како и регионалната, европската и глобалната соработка. Форумот претставува добра можност за унапредување на економската соработка и за отворање нови видици во изградбата на стабилен економски развој во регионот и пошироко.
Економскиот форум "Кран Монтана", чие седиште е во Монако, со години организира собири кои стимулираат меѓународен дијалог со цел разбирање, особено во високите општествени и стопански кругови. Во рамките на Форумот стопанствениците, политичките лидери, стратезите на меѓународните организации, угледни бизнис и финансиски експерти, во соработка со медиумите, настојуваат заеднички да овозможат создавање услови за квалитетен живот на сегашните и идните генерации.