ОТВОРЕНО ТРГОВСКО ПРЕТСТАВНИШТВО НА МАКЕДОНИЈА ВО ПРИШТИНА

Премиерот Владо Бучковски вчера го отвори Трговско-економското претставништво на Македонија во Приштина, што треба да биде основа за интензивирање на економската соработка меѓу Македонија и Косово.
Бучковски на отоворањето на претставништвото рече дека преку него понепосредно ќе се изразуваат интересите и можностите за македонско-косовската економско-трговска соработка.
"Со тоа ќе се осознаваат интересите на стопанствениците од овде и ќе можат да се координираат со нивните партнери во Македонија. Како Влада ние го поздравуваме овој процес и укажуваме дака економската, трговската и другите форми на соработка ќе бидат поддржани во рамките на нашите надлежности. Заеднички можеме да привлечеме повеќе странски инвеститори и да овозможиме повеќе работа за граѓаните, а со подобра економска соработка се создаваат можности за решавање и на други прашања, односно за подобро разбирање на економските и на другите потреби на граѓаните", истакна Бучковски.
Според Бучковски, трговското претставништво на Македонија во Приштина е уште еден институционален облик кој треба да помогне во динамизирањето на стопанската активност, но и на соработката меѓу компатибилни економии кои имаат бројни интереси.
"Нашето присуство овде во Приштина, со репрезентативна делегација од власта и од стопанството од Република Македонија е со цел да им дадеме поттик на стопанствениците кои ги познаваат приликите во економската сфера и кои можат да ја динамизираат надворешно-трговската размена, заедничките вложувања и финансиските текови што е од заемен интерес и ги подобрува регионално економските перформанси", рече македонскиот премиер.
Истакнувајќи дека определбите на македонската Влада во доменот на економската сфера се насочени кон поттикнување на пазарниот амбиент, привлекување на странските инвестиции, а во тие рамки и соработката на регионална основа, Бучковски оцени дека потенцијали и можности за проширување на соработката постојат и оти со изнаоѓање на прагматични решенија треба да се настојува да се поттикнуваат стопанските субјекти да се вклучат во активното пазарно работење и делување.
"Благодарејќи на добрата соработка со Мисијата на Обединетите нации на Косово, како и на воспоставените нормативно правни основи, се овозможи отварањето на ова претставништво. Очекуваме дека ќе се оформуваат услови за подинамична соработка и за отстранување на било какви административни бариери и пречки кои секогаш се можни", истакна македонскиот премиер на отворањето на Трговско-економското претставништво на Македонија во Приштина. Вршител на должноста шеф на македонското трговско претставнишво во Приштина е Шевќет Хазари.
На отворањето на претставништво присуствуваа и шефот на УНМИК Сорен Јесен Петерсен и косовскиот премиер Рамуш Харадинај.
Петерсен изјави дека отворањето на претставништвото е уште еден знак за континуираниот дијалог меѓу Приштина и Скопје, додавајќи дека со тоа се отвораат нови можности за соработка меѓу бизнисмените од Македонија и од Косово.
Косовскиот премиер Харадинај го поздрави отворањето на трговско-економското претставништво и додаде дека тоа ќе значи поттик за воспоставување подобра економска соработка меѓу Македонија и Косово.