"ДЕНОВИ НА СОБРАНИЕТО" - СЕДНИЦА НА ДЕТСКИОТ ПАРЛАМЕНТ И ШАХОВСКИ ТУРНИР

Во рамките на манифестацијата "Денови на Собранието" Детскиот парламент на Македонија - ДПМ денеска во Собранието на Република Македонија одржува седница на која се симулира работењето на Парламентот.
На симулацијата ќе учествуваат 120 делегати од претставништвата на ДПМ во Македонија.
Главна тема на работниот дел е кршењето на детските права, за што ќе биде донесена декларација против злоупотребата на децата. Ќе се одржи и митинг против злоупотребата на децата пред Собранието и дефиле на членовите на ДПМ од Собранието до плоштадот "Македонија". Дефилето ќе заврши во Летната сцена на Градскиот парк во Скопје со еко парадата на тема "Децата сакаат да живеат во чиста еколошка средина".
"Деновите на Собранието" во текот на денов продолжува со одржување Шаховски турнир по швајцарски систем во 10-11 кола, на кој ќе учествуваат 30 натпреварувачи.
Во рамките на манифестацијата вчера попладне беше одржана трибина на која се дискутираше колку Собранието ја контролира Владата и дали државните институции, вклучувајќи го и Парламентот, имаат изградено односи со јавноста
"Забелешки за нашата работа ни упатуваат граѓаните, медиумите и интелектуалците, иако на голем дел од нив им недостига практично искуство во политиката. Не се согласувам дека Собранието е гласачка машина", напомена претседателот на Парламентот Љупчо Јордановски во воведното излагање.
Според него, проблем, кога станува збор за ефикасно работење на Законодавниот дом, е прашањето дали пратениците знаат да се спротивстават на владините решенија доколку тие не соодветствуваат на она што било ветено на изборите.
За поефикасна работа на Парламентот, потенцира Јордановски, е неопходно создавање независен собраниски буџет.
Посочувајќи на слабостите во комуникацијата со граѓаните, Јован Корубин, професор на Филозофскиот факултет во Скопје, оцени дека државните институции во земјава се уште немаат изградено односи со јавноста.
"Досега многу малку се внимаваше на тоа дали и како Парламентот комуницира со јавноста. Немам впечаток дека Собранието е место каде што се водат конструктивни дискусии. Институцијата ја прават луѓето што работат во неа, а нашите пратеници не водат сметка дека со својот настап креираат извесно мислење што резултира со генерализирање за институцијата и тоа, често, во негативен контекст", забележа Корубин.
Медиумите со својот однос кон државните институции, посебно кон Парламентот, додаде Корубин, во последно време конструираат некаква стварност, наместо да дадат реален приказ.
Со Корубин се согласи и Рената Дескоска, доцент на Правниот факултет во Скопје, која истакна дека на Парламентот му недостига вистинска јавност, но не пасивна што ќе ги следи седниците преку телевизиски пренос, туку активна, што директно ќе учествува во работата на собраниските тела.
Аналитичарот и поранешен пратеник Мерсел Биљали, досегашната работа на македонското Собрание ја подели на три периоди.
"Во првите пет години од формирањето, дефиниравме повеќе клучни прашања, но пристапот ни беше ирационален, посебно од етнички аспект. По десет години, прецизиравме помалку круцијални прашања, а помали беа и изливите на етничка енергија. Во последниве пет години се ослободивме од ирационалните настапи, но работата на Парламентот е значително депрофесионализирана", истакна Биљали.
Тој заклучи дека работата и организацијата на Собранието зависат од креирањето на политиката. "Парламентот не треба да ја базира својата работа врз мислењето дека владее со граѓаните, туку напротив, дека граѓаните владејат со општествените интереси преку Парламентот", рече Биљали.
На Македонија, дополни Биљали, допрва и претстои воспоставување систем на вистински вредности што подразбира начин на размислување, одговорност и совест.
Според аналитичарот Хисен Рамадани, на македонското Собрание му недостига социјална димензија. "Парламентот треба да произлезе од социјалната демократија, а во него да преовладуваат дискусии од општ интерес. Партиите што носат предзнак 'социјална' кога ќе дојдат на власт обично стануваат десно ориентирани", забележа Рамадани.
Пратеничката Славица Грковска рече дека има многу предрасуди кај граѓаните за работата на Парламентот што веројатно ќе бидат надминати поради можноста неговата работа да се следи директно преку вториот канал на Македонската телевизија.
На отворената панел дискусија присуствуваа експерти, претставници од невладините организации и новинари.