ДИПЛОМАТСКИОТ КОР НА ПРИЕМ КАЈ ПРЕТСЕДАТЕЛОТ ЦРВЕНКОВСКИ

Претседателот Бранко Црвенковски денеска организираше новогодишен и божикен прием за претставниците на дипломатскиот кор во Македонија на кои им посака лична среќа и просперитет и благосостојба на нивните земји и народи.
Изминатата година тој ја оцени како година во која повеќе од кога и да е човештвото било соочено со глобалните закани - меѓународниот тероризам, организираниот криминал, верската и религиозната нетолеранција, сиромаштијата и гладот. Како таква 2004 година, според Црвенковски, е потврда дека народите се упатени едни на други во борбата со злото против човештвото.
"Уверен сум и посакувам 2005-та да биде година во која меѓународната заедница ќе се сплоти во заедничката решеност за изградба на подобар свет, на побезбедена и попросперитетена иднина за сегашните и сите идни генерации", истакна Црвенковски.
Оценувајќи ја 2004 како исклучително тешка година и за Република Македонија, шефот на државата ја посочи трагичната загуба на претседателот Трајковски, предвремените претседателски избори, референдумското изјаснување на граѓаните за новата територијална организација, превирањата на политичката сцена кои, како што рече, претставувале сериозни тестови за зрелоста и демократскиот капацитет и потенцијал на Република Македонија.
"По сите премрежја мојата земја покажа и докажа дека е држава која во манир на најстарите демократии може да се соочува со разни предизвици, и да опстојува стабилна на реформскиот курс, со цврста определба за натамошен економски развој и интегрирање во ЕУ и НАТО", подвлече Црвенковски, заклучувајќи дека Република Македонија има капацитет да ја одржува својата стабилност и да биде пример за меѓуетничка толеранција и разбирање и регионална соработка, сериозен кандидат за членство во европските и евроатланТските интеграции.
Според претседателот, Македонија има цврсто дефинирани приоритети за идните години, за кои постои општ консензус кај сите граѓани во земјата. Меѓу нив тој ги спомна европската иднина и економската развиеност на Македонија.
"Оваа година треба да биде година на брз економски развој на земјата, година во која ќе се подобри животниот стандард на граѓаните, ќе се намали сиромаштијата и ќе се врати преспективата посебно кај младите луѓе. Цврсто верувам во можностите на Република Македонија и што побрзо ваквите очекувања се реализираат, многу полесно ќе ги оствариме стратешките цели на земјата", истакна претседателот Бранко Црвенковски.
Во името на дипломатскиот кор на приемот говореше амбасадорот на Хрватска во Македонија Александар Милошевиќ
Македонија и нејзините граѓани ги исполнуваат високите демократски стандарди и највисоките стандарди на политичкото живеење, рече амбасадорот Милошевиќ, изразувајќи надеж дека 2005. ќе биде година на мир и политички и економски напредок на земјата.
"Ние, претставниците на меѓународната заедница во Македонија, веруваме дека и претстојните локални избори само ќе ја потврдат оваа оценка. Охрабрува подготвеноста на сите релевантни политички и етнички фактори за доследно спроведување на сите одредби на Охридскиот договор. Веруваме дека Македонија има доволно кадровски потенцијал и политичко единство за спроведување на реформите кои се очекуваат од земјите кои бараат полнодравно членство во НАТО и Европската унија", истакна амбасадорот Александар Милошевиќ во името на дипломатскиот кор.