ЕКОНОМСКАТА СОРАБОТКА ПРИОРИТЕТ ЗА МАКЕДОНИЈА И РУСИЈА 

Русија и Македонија имаат историски добри, пријателски и конструктивни односи без никакви проблеми, а фокусот на идната билатерална соработка треба да се насочи кон подобрување на економските врски, оценија министрите за надворешни работи на двете земји Илинка Митрева и Сергеј Лавров на вчерашната прес-конференција во Скопје.
Шефот на македонската дипломатија информира дека со Лавров разговарале за политичката и економската соработка, за состојбата во регионот и за меѓународни прашања.
"Односите со Русија се приоритет за Македонија", рече министерката Митрева, посочувајќи оти централно место во разговорите со шефот на руската дипломатија имала економската соработка.
"Договорено е одржување на третиот состанок на Меѓувладината комисија за трговска, економска и научно-техничка соработка во јануари следната година на која би биле разгледани можностите за либерализација на трговскиот режим, за зголемување на трговската размена и на македонскиот извоз во Русија, за соработката во енергетиката и за учеството на руски партнери на македонскиот пазар", рече Митрева. Договорено е наскоро да биде потпишана и меѓувладината спогодба за регулирање на клириншкиот долг на поранешната поранешниот СССР кон Македонија
Шефот на руската дипломатија за наредната година најави потпишување на серија билатерални спогодби за економска, воено-техничка, културна и друг вид соработка што, како што посочи, очекува да биде направено при следната посета на министерката Митрева на Москва.
Лавров ја нагласи улогата на Македонија за стабилноста на регионот и искажа поддршка за побрза демаркација на македонската северна граница.
"Русија ја оценува како многу значајна улогата на Македонија за одржување на стабилноста на Балканот и ја поддржува секоја иницијатива која доаѓа од македонска страна. Ја изразивме и поддршката за обележување на границата меѓу Македонија и СЦГ во делот кон Косово", истакна рускиот министер за надворешни работи.
Образложувајќи во што се состои руската поддршка за демаркација на северната граница, Лавров нагласи дека тоа пред се би било поддршка на резолуција што за тоа прашање би била разгледана во Советот за безбедност во ОН. "Токму во рамките на Советот за безбедност со учество на Владата на Македонија и на други заинтересирани треба да бидат најдени модалитети за решавање на тие проблеми. Тука треба да земат учество Владата во Белград, УНМИК и привремените органи на самоуправа во Косово. Ова е најважното прашање, бидејќи откако ќе се реши, ве уверувам дека ќе се најдат и пари и луѓе кои ќе го споведат обележувњето на границата", рече Сергеј Лавров.
Министрите за надворешни работи на двете земји разговарале и за соработката во рамките на меѓународните организации и ОН, особено во Антитерористичкиот комитет во Советот за безбедност чиј претседавач е Русија.
Теми на средбата Митрева - Лавров биле и културната соработка и можноста за отворање културни центри на Македонија во Русија и на Русија во Македонија. Заедничка е оценката дека манифестациите одржани по повод 10 години од воспоставувањето дипломатски односи биле потврда за пријателството и соработката меѓу Македонија и Русија.
Шефовите на дипломатиите на двете земји денеска потпишаа и План за работни консултации меѓу министерствата за надворешни работи за 2005 и 2006 година. Министерот Лавров информира дека претседателот на Република Македонија Бранко Црвенковски ја прифатил поканата на рускиот претседател Владимир Путин во наредната година да учествува на прославата во Москва по повод 60 години од победата над фашизмот.