ИНФО

            English

            Македонски

Според изјавата на Тања Алтанџиева, заменик-министерот за правда, Извештајот за авионската несреќа во која загинаа претседателот Борис Трајковски и осумчлената делегација, властите на Босна и Херцеговина го доставија до Министерството за правда. Алтанџиева појасни дека јавниот обвинител треба да одлучи дали има основа да се поведе постапка. Претходно, јавната обвинителка Меџида Кресо изјави дека е затворена истрагата за уривањето на владиниот авион "Кингер" на 26 февруари и дека никој нема да биде обвинет зашто не биле пронајдени аргументи за кривично гонење. Инаку, Извештајот кој го подготви обвинителството на Босна и Херцеговина, освен до Министерството за правда е доставен и до МВР, Министерството за транспорт и врски и до Јавното обвинителство. За авионската несреќа на претседателот Трајковски проструија многу контроверзи за неспецифичноста на случајот, дури и дека е можно да станува збор за атентат, како што шпекулираше претседателот на Светскиот македонски конгрес, Тодор Петров.

Граѓаните од Скопје предводени од Координативното тело на Граѓанската асоцијација "Пружи отпор-кажи не" ги оставија во зградата на Телекомот своите телефонски сметки со образец во кој бараат детаљна сметка за пресметаните разговори. Но, одѕивот на скопјани беше многу мал, само околу стотина граѓани, а според Центарот за поддршка на невладините организации приближно ист број граѓани излегле во Штип, Велес, Кичево, Гостивар и во Дебар. Во другите градови одѕивот на граѓаните бил помал поради лошата координација на невладините активисти. Коте Ламбовски, заменик-директор за маркетинг во Телеком вели дека комисиски ќе бидат разгледани сите приговори на граѓаните, а претплатниците ќе бидат информирани или по телефон или по пошта, во најбрз можен рок. Инаку, веќе подолг период Македонски телекомуникации го злоупотребуваат монополот на пазарот, а со последното поскапување на телефонскиот импулс незадоволството на граѓаните стана уште поголемо.

Македонскиот фармацевтски гигант "Алкалоид" и познатата веледрогерија "Зегин" ќе формираат заедничка компанија. Информацијата ја потврдија сопственикот на "Зегин" Благој Меанџиски и директорот на "Алкалоид" Живко Мукаетов. Според двајцата челни луѓе на овие две успешни македонски фирми, ваквото обединување ќе овозможи нов квалитет во работењето, но и приближување до крајните корисници - граѓаните кои ќе можат да добијат поквалитетни и поевтини производи. Засега не се откриваат детали околу соодносот на капиталот во новата компанија и во двете фирми велат дека ќе се земат предвид сите параметри кои ќе ги обезбеди независната ревизија. Околу мотивите за спојувањето на фирмите се вели дека фармацевтската бранша во целиот свет е во фаза на окрупнување, што обезбедува поголеми потенцијали за компаниите, но и подобра позиција на пазарот.

Министерството за здравство даде дозвола за отворање на родилиштето и на Педијатриското одделение и специјалната болница за гинекологија и акушерство "Чаир". Одлуката е донесена откако Државниот санитарен и здравствен инспекторат ја укина наредбата за редуцирање на раѓањата во чаирската болница, издадена на 5 август, поради можна појава на стафилококна инфекција. Од таму посочуваат дека изворот на инфекцијата не е до крај дефиниран затоа што при прием во болницата родилките не се испитуваат на клициносителство и затоа е можно да се внесе инфекција и од надворешна средина. Во соопштението од Министерството за здравство се појаснува дека првите резултати од земените мостри при појавата на кожни инфекции кај бебињата родени во болницата "Чаир" не може децидно да го определат причинителот затоа што во земените мостри имало присуство на бактеријата стафилококус ауреус и кај дел од вработените и кај дел од родилките.

Поради големиот интерес кој го пројавиле корисниците во врска со кампањата 300 гратис СМС за новите во Тандем, со која носителот на претплатничкиот договор користи 50 отсто од претплатата за разговори и СМС, а другите членови - нула денари претплата, пониски цени на мобилни телефони и по 100 бесплатни СМС пораки, се продолжува уште 30 дена. Кампањата почна на 15 јули и требаше да трае до 15 август, но Мобимак им излезе во пресрет на барањата на своите корисници и неа ја продолжи до 15 септември за новите корисници на Тандем.