ПРЕМИЕРОТ КОСТОВ УЧЕСТВУВАШЕ НА ФОРУМ ЗА СТАБИЛНОСТА НА ЈУГОИСТОЧНА ЕВРОПА

Македонскиот премиер Хари Костов учествуваваше на Форумот "Стабилноста на Југоисточна Европа во 21 век", што вчера се одржа во Салцбург, под покровителство на австрискиот канцелар Волфганг Шисел.

На форумот учествуваа и премиерите на Албанија, Фатос Нано, на Бугарија, Симеон Саскобурготски, на Црна Гора, Мило Ѓукановиќ и на Романија, Адријан Настасе, како и шефот на австриската дипломатија Бенита Фереро-Валднер и координаторот на Пактот за стабилност за Југоисточна Европа, Ерхард Бусек.

Главен акцент на Форумот бил ставен на можностите и ризиците по стабилноста во регионот на Југоисточна Европа, а во рамките на средбата се дискутирало и за актуелната состојба на Балканот, и особено за Косово. Притоа не биле посочени конкретни заклучоци околу решавање на статусот на Косово, туку се дискутирало за формите на стабилизирање на целиот регион, што ќе го услови и економскиот развој.

Теми на разговорот на средбата, која се одржува по вторпат, биле формите за енергетска заедница на Југоисточна Европа, симнување на бариерите на слободните зони за движење на стоки и капитал.

"Ова ќе биде традиционална средба со нови форми на соработка од која ќе произлегуваат идеи и конкретни решенија на кој начин да се соработува во регионот", изјави за МИА Мирјана Контевска, портпаролката на кабинетот на Костов. Таа додаде дека Австрија и во наредниот период ќе го помага исполнувањето на условите и стандардите за интеграција на овие земји во Европската унија.

Премиерот Костов ќе оствари билатерални средби со своите колеги од регионот. На форумот не допатуваа премиерите на Србија, Хрватска и на Босна и Херцеговина.
 

АМАНДМАНСКА РАСПРАВА ПО ПРЕДЛОГ ЗАКОНОТ ЗА ТЕРИТОРИЈАЛНА ОРГАНИЗАЦИЈА

Собранието на Република Македонија денеска ја продолжи 72-та седница со расправа по поднесените амандмани на Предлог-законот за територијална организација на локалната самоуправа, како дел од пакетот закони за децентрализација.

Во досегашната амандманска расправа, што почна во понеделникот, не е поддржан ниту еден амандман од вкупно разгледаните 26, поднесени главно од пратеничката група на ВМРО-ДПМНЕ.

Ставот на министерот за локална самоуправа Александар Гештаковски за нивното неприфаќање, генерално, е дека општините споменати во амандманите не се економски моќни за да бидат самостојни.

Собранието треба да расправа по уште најмалку 130 амандмани.

Со Предлогот на законот за територијална организација на локалната самоуправа се предвидува досегашниот број општини од 123 да се намали на 80, односно на 76 општини до 2008 година.

НАСТАП НА СИМОН ТРПЧЕСКИ ВО ЛОНДОНСКИОТ РОЈАЛ АЛБЕРТ ХОЛ

Македонскиот пијанист Симон Трпчески во рамките на годинешниве Музички свечености "Промс" настапи во Ројал Алберт Хол во Лондон, најрепрезентативната и најголема концертна сала во Велика Британија.

Во придружба на Шкотскиот камерен оркестар со кој диригираше Џозеф Свенсен, Трпчески го изведе Концертот за пијано број 2 од Камиј Сен Сан и за своето музицирање доби огромен аплауз од неколку илјадната публика.

Како и многупати досега кога станува збор за неговите настапи на лондонските музички подиуми, Трпчески и на овој свој концерт ја одушеви публиката која секогаш знае да го цени и почитува неговото свирење, па својот прекрасен настап во Ројал Алберт Хол го заврши со свирење на бис.

Задоволен од концертот и од приемот кај лондонската публика, Трпчески изјави дека за него е огромна чест што можел да свири на "Промс".

"Задоволство и чест ми претставува поканата да настапам на овие свечености на музиката со толку голема и долга традиција каде доаѓаат само големи музичари. Ова беше убава можност за мене уште еднаш да го покажам своето музициранје", изјави Трпчески по заврсувањето на концертот.

Тој оцени дека ова за него бил мошне вазен настан. "Задоволен сум
од она како помина концертот, од тоа што можев да свирам со еден одличен
оркестар, каков што е Шкотскиот камерен оркестар, најдобар ваков состав на Островите, со еден прекрасен диригент и над се поради настапот во ова
раскошно здание какво што е Ројал Алберт Хол и пред неговата четириилјадна публика", нагласи Трпцески.

Како што јави дописникот на МИА од Лондон, целиот концерт на кој беа изведени и Ческата суита од Антонин Дворжак и Симфонијата број 2 од Роберт Шуман беа директно пренесувани на телевизија и радио, а свирењето на Трпчески и шкотските музичари можеше да се следи во живо и преку Интернет.

Симон Трпчески останува неколку денови во Велика Британија каде за компанијата ЕМИ го подготвува издавањето на неговото второ ЦД на кое го свири Рахмањинов, а со лондонската публика ќе има нова средба во октомври, кога ќе настапи со Лондонската филхармонија, со која веќе двапати има настапувано.