Вицепремиерот за европски прашања Бујар Османи не сака да го коментира последниот предлог што го даде медијаторот Метју Нимиц на вчерашната средба во Њујорк со преговарачите Васко Наумоски и Адемантиос Василакис се додека не биде разгледан и не се изгради заеднички став, но нагласува дека е добро што има нов предлог за името.
– Не можам да коментирам за последниот предлог бидејќи треба да стигне во Скопје. Мислам дека во понеделник ќе имаме заедничка средба за да го разгледаме и да изградиме став. Знам колку сме посветени и одлучни да одиме до крај во решавање на ова прашање, знаејќи го контекстот и историскиот моментум пред кој се наоѓаме како држава. Добро е што има предлог и се интензивира целиот процес и што има меѓусебни директни контакти помеѓу владите на различни нивоа. Тоа е единствен предуслов да стигнеме до ситуација да изнајдеме решение, рече Османи, одговарајќи на прашање по средбата со косовската министерка Дурата Хоџа во СЕП.
Во врска со планот 3-6-9 рече дека веќе е поделен на ниво на месеци и е утврдена агенда што треба да се реализира до крајот на месецов.
– Изминативе денови имав средба со повеќето министествата кои имаат обврски во делот на планот 3-6-9. Можам да кажам дека тоа што е дел од обврски на Владата се реализира и оди по план. Во Собранието имаме мал предизвик, бидејќи опозицијата не учествува во работата, а ние не сакаме да наметнеме некои решенија кои се посензитивни и во услови кога имаме мнозинство да ги усвоиме. Сепак, особено за тие закони за кои е потребно двотретинско мнозинство ќе треба да се создаде политички амбиент за даможе да се усвојат, рече Османи и додаде дека е потребен национален консензус за планот 3-6-9.