Mинистерот за култура Исмаили се сретна со албанскиот амбасадор Река

Министерот за култура Хусни Исмаили денеска се сретна со албанскиот амбасадор во земјава Фатос Река.

На средбата, како што соопшти Министерството за култура, Исмаили и Река размениле мислења за досегашната успешна соработка во областа на културата меѓу Северна Македонија и Албанија, како и за потребата од нејзино натамошно продлабочување.

Соговорниците истакнале дека во согласност со Програмата за културна соработка меѓу министерствата на двете земји, досега се реализирани многубројни активности во областа на културата, и тоа во музичко-сценската, драмската, литературната и издавачката дејност.

Исмаили истакна дека традиционално албанските поети и писатели учествуваат на книжевните манифестации во државава, како што се Струшките вечери на поезијата, а од особено значење е и фактот што мината година нашата земја за првпат се претстави на Интернационалниот саем на книгата во Тирана, кој постои веќе 20 години и е еден од најважните настани во контекст на промоцијата на албанската книжевност и култура, се наведува во соопштението.

Министерот додал дека Министерството за култура традиционално и годинава ја поддржа реализацијата на манифестацијата „Македонско културно лето“ во Мала Преспа, а е планирано Албанскиот театар, во рамките на својата балканска турнеја, да гостува и на фестивали во Албанија.

Инаку, значителна е соработката меѓу Република Северна Македонија и Република Албанија и на мултилатерален план, преку долгорочниот проект „Прекуграничен биосферен резерват Охрид-Преспа“ и вклученоста во заедничката иницијатива на УНЕСКО и ЕУ – „Кон зајакнатo управување со заедничкото прекугранично природно и културно наследство на Охридскиот регион“. Со цел продлабочување на соработката во сите сфери на културата меѓу Република Северна Македонија и Република Албанија, во тек е и постапката за отворање културно-информативни центри во двете држави, со седишта во Скопје и во Тирана, стои во соопштението.

Leave a Reply

Your email address will not be published. Required fields are marked *