Анкетите покажуваат дека европската визија го губи својот сјај, а на тоа место, етно-национализмот повторно се појавува на површина со многу загрижувачки развој, изјави пратеникот од опозициската ВМРО-ДПМНЕ Александар Николоски во Стразбур по повод денешната дебата во Парламентарното собрание на Советот на Европа за Западен Балкан , јави дописникот на МИА.
-Тоа што и се случува на мојата држава – Македонија е најдобар пример за ова. Грција беше таа која ставаше вето на отворањето на пристапните преговори со години и потоа од 2020 година тоа е Бугарија, користејќи ја својата позиција како земја членка на ЕУ да ја уценува Македонија, го негира постоењето на македонска нација, ја негира македонската кулутра и историја и тврди дека македонскиот јазик е дијалект на бугарскиот јазик. Се ова Македонија е притисната да го прифати за да ги отвори пристапните преговори и да може еден ден да стане земја членка на ЕУ. Правилото на едногласност во процесот на пристапување брутално го злоупотреби Бугарија. Затоа многу млади губат верба и или заминуваат од државата или бараат други алтернативи , рече Николоски.
Во Извештајот е напишано дека Советот на Европа го поздравува отворањето на пристапните преговори со Северна Македонија на 19 јули 2022, што тој смета дека тоа не е точно.
– Македонија не ги отвори пристапните преговори туку само беше притисната да го промени Уставот според бугарски диктат и услови. Без промена на Уставот нема пристапни преговори. Сите ќе се согласите дека ова е брутална интервенција на суверенитетот и независноста на државата. Не постои ваков втор пример на ниту една друга земја кандидат за ЕУ која се соочила со вакви предуслови, ова не е европска вредност, вели Николоски.
За пратеникот од ВМРО-ДПМНЕ, „Бугарија го користи истиот провокативен дискурс како и Владимир Путин“.
-Путин вели дека нема украинска нација и јазик, тие се Руси, бугарските политичари велат дека нема македонска нација и јазик, тие се Бугари и ако Македонија сака да напредува кон ЕУ мора да го прифати ова, Поради ова го повикувам Советот на Европа во овој извештај да предложи отворање на пристапните преговори за Македонија без понатамошни одложувања и дополнителни барања. Советот на Европа треба да побара од ЕУ да ги почитува своите Копенхашки критериуми. Промената на Уставот на независна држава не треба да е услов за пристапни преговори. Советот на Европа треба да побара од Бугарија да престане да врши притисок за уставни измени во Македонија и да дозволи пристапни преговори. ЕУ треба да ги искористи своите механизми за да го наложи ова. Само со ова ќе се врати довербата и оптимизмот за европската перспектива, посочува Николоски.
Друго важно прашање според него, е борбата против организираниот криминал и корупција при што го поздрави директниот акцент во извештајот на овие проблеми. Пратеникот од ВМРО-ДПМНЕ побара од ЕУ и Советот на Европа да направат притисок за имплементацијата на областите кои што се приоритет, како што се владеење на правото и добро владеење, вклучувајќи ефикасност, независност и верба во судството, борба со корупција и реформи на јавната администрација во земјава.
-Македонија треба да ги почне преговорите за членство во ЕУ затоа што граѓаните на Македонија тоа го заслужуваат, без никакви понатамошни барања и услови од Бугарија како што се промена на Уставот. Само таков пристап може да доведе до добри соседски односи и пријателски односи помеѓу македонскиот и бугарскиот народ во заедничкото европско семејство, смета Николоски.