Премиерката на Велика Британија Тереза Меј и министерот за надворешни работи Борис Џонсон уште еднаш ја изразија силната поддршка за аспирациите на Македонија за членство во ЕУ и НАТО.
Како што соопшти прес-службата на македонската Влада, во рамки на приемот што во чест на шефовите на владите на земјите од Западен Балкан го приреди Тереза Меј, таа и Џонсон имаа одвоена средба со премиерот Зоран Заев и вицепремиерот Бујар Османи.
На одвоената средба беше изразен посебен интерес за спроведувањето на реформите во Македонија, како и за добрососедските односи и за проектите во регионалната соработка што беа акцентирани за време на Инвестицискиот самит за Западен Балкан во организација на Европската банка за обнова и развој што се одржа вчера во Лондон.
Премиерот Заев информираше и за најновите активности на Владата во однос на евроатлантските интеграциски процеси, посебно нагласувајќи ги очекувањата нашата земја да добие препорака за почнување на преговорите со ЕУ, како и за очекувањата да бидеме 30. земја членка на НАТО во 2018 година.