Снежните врнежи што вчера попладнето и во текот на ноќта ја зафатија земјата предизвикаа проблеми и потешкотии во електродистрибутивната мрежа во Охридско-струшкиот регион.
Во Охрид, состојбата се нормализира, со снабдувањето со електрична енергија откако се санирани дефектите. Се уште има испади од системот, но тие се краткотрајни и не предизвикуваат поголеми проблеми.
Во Струга, поради поголем дефект во системот за напојување со електрична енергија без струја се делови на градот и речиси сите села во општината. Во прекин е и водоснабдувањето, а проблем има и во одвивањето на сообраќајот поради неисчистените локални патишта.
Општина Дебрца е надвор од електричната мрежа, но се работи на отстранување на дефектот. Се очекува нормализирање на состојбата во однос на снабдувањето со електрична енергија. Проблем има и со водоснабдувањето во некои села, а непроодни се и патиштата што водат кон селата на повисока надморска височина.
Престанокот на врнежите и стабилизацијата на времето ја олеснува работата на службите кои се ангажирани на санирање на системите за електро и водоснабдување, како и на службите за расчистување на патиштата.