Дебарското муфтиство, кое ги опфаќа општините Дебар, Центар Жупа и подрачјето на Река, општина Маврово и Ростуше, денеска ги отвори џамиите за верниците.
Координаторот на муфтиството Решат Качалнику истакна дека сите верници биле запознаени со последната одлука на Ријасетот на ИВЗ за отворање на џамиите и со мерките кои треба задолжително да ги почитуваат, доколку сакаат да влезат во верскиот објект.
Тој посочи дека верниците ги известиле и преку официјалната веб страница на Муфтиството и преку локалните и регионални медиуми.
– Во досегашниот период вршевме онлајн пренос на молитвите кои ги извршуваа имамите сами. Пренесувани на медиумите кои постојат во нашиот град беа и предавањата на нашите имами. Со тоа ќе продолжиме и понатаму, додава Качалнику.
Во објавата на Муфтиството се наведува дека дневните намази ќе се клањаат во џамија, освен сабах и акшам, поради тоа што се за време на полицискиот час, па верниците тие клањања ќе ги вршат дома.
– Ги замолуваме верниците да ги почитуваат мерките за заштита со кои претходно ги запознавме. Му благодариме на Возвишениот Алах што ги отвори џамиите во месец Рамазан, и не повика повторно да се вратиме во нив. Алах да го прими нашиот пост, и нашите молитви и да ни ги прости гревовите, стои во објвата на дебарското муфтиство.
На територијата што го опфаќа дебарскто муфтиство има околу 50 џамии, кои беа дезинфицирани уште на почетокот на пандемијата, а тоа е направено и деновиве по најавата за нивно отворање за верниците.