Во моментов не постојат научни докази дека храната претставува извор или преносител на вирусот корона, соопшти Европската агенција за безбедност на храна (ЕФСА).
Оваа информација ја сподели официјално и Агенцијата за храна и ветеринарство (АХВ) на својата веб и фејсбук страница.
ЕФСА, како што наведува, будно ја следи ситуацијата во однос на појавата и ширењето на COVID-19.
-Искуствата од претходните појави на сродни корона вируси, како што е SARS-CoV и MERS-CoV, докажуваат дека не постои појава на ширење на вирусот преку конзумирање храна. Во овој момент, не постојат докази дека овој вирус во тој поглед се разликува од претходните вируси.
Научниците и надлежните органи ширум светот го следат ширењето на вирусот и до сега не постојат извештаи дека се шири преку храна, вели Марта Хугас, главен научник во ЕФСА.
Во однос на безбедноста на храната, Светската здравствена организација (WHO) објави препораки и мерки на претпазливост за следење добри хигиенски пракси за време на ракување со храна: миење раце, соодветна термичка обработка на месото и избегнување вкрстена контаминација меѓу зготвената и незготвената храна.