Во рамки на Еразмус плус програмата, по првата Мобилност одржана во Италија, денеска во ООУ „Методија Митевски-Брицо“ во Лозово на втора Мобилност под слоганот „Играј и учи за младоста“ се сретнаа и другаруваа децата од ова училиште со свои врсници од Португалија, Грција и Бугарија, а за жал децата од Италија од Сардинија беа спречени да допатуваат поради ново настанатата состојбата со коронавурусот во оваа земја.
Проектот се спроведува со финансиска поддршка на Европската комисија за образование, а координатор се претставниците од Грција, односно од едно мало населено место близу градот Лариса.
Како што информира Светлана Стојкова професор по француски и координатор на проектот од ООУ „Методија Митевски – Брицо“ од Лозово, проектот има за цел да ги промовира трајните европски вредности преку промовирање на играта како детектор на учење.
-Ние во наредните неколку денови ќе ги промовираме старите традиционални детски игри и затоа имаме повеќе активности, преку кои сакаме да ја вратиме детската игра во нашите училишни дворови преку игрите што ги играле нашите баби и дедовци, потенцира Стојкова.
Таа оценува дека ова е прекрасна тема што е прифатена од сите наставници и ученици вклучени во проектот. Тие сите денеска одржаа и заедничка културна програма во која се претставија и домаќините и гостите, а попладнево ќе учестуваат на тркалезна маса на тема„ Да се врати играта во училишните дворови“.
Во рамки на проектот во училиштето во Лозово, домаќините и гостите ќе уредат и катче „PLEY“ со играчки од сите партнерски земји.
Гостите ќе се запознаат со македонскиот образовен систем, а ќе имаат и јазично ателје во кое ќе креираат иилустрираат постери со лексика и вокабулар на тема игра.
Во наредните четири – пет дена од нивното заедничко дружење, децата – домаќини заедно со нивните гости ќе ја посетат и Француската Амбасада и Францускиот институт во Скопје,како и културни знаменитости. Во сабота претпладне ќе се дружат и со хероината на документарниот филм „Медена земја“ Атиџе Муратова, а која е по потекло од овој крај.
Стојкова потенцира дека Еразмус плус програмата значи збогатување на духот и себепознавање и јакнење на самодовербата не само на учениците туку и на наставниците и им овзможува промоција на франкофонските вредности.