Свечена заклетва на 39-та генерација млади војници на доброволно служење во Армијата

Во Командата за обука и доктрини КОД во велешката касарна „Алексо Демниески Бауман“  денеска свечена заклетва даде 39-та генерација млади војници на доброволно служење во Армијата. Во оваа генерација на тримесечна обука се 108 млади војници меѓу кои и 10 девојки.

На свеченоста освен Командантот на КОД, бригадниот генерал Методи Хаџи Јанев, присуствуваа и началникот на ГШ генерал – мајорот Васко Ѓурчиновски заменик министерот Беким Максути и други генерали, како и други гости, родители, роднини и пријатели на младите војници.

Свечено дадената заклетва на младите војници им ја честита заменик министерот за одбрана  Максути, кој ги информира дека со реализација на оваа обука им се отвара можност да станат дел од професионалните војници на нашата Армија и таму да ја градат својата кариера полна со предизвици, достигнувања на личен и професионален план, кариера со голем број можности за обука тренинг и наобразба.

-Нашата Армија е препознатлива по својата разноликост и токму затоа во неа има претставници од различна етничка и верска припадност. Особено ме радува фактот што од година во година бројот на жени во Армијата се зголемува со што се покажува дека оваа професија не препознава пол, истакна Максути.

Тој додаде дека тие се нашите идни бранители, идни чувари на нашиот територијален суверенитет и интегритет и нашите идни амбасадори на мирот во меѓународните операции.