Годинашните 52. Детски Рацинови средби вчера беа отворени со доделување награди од конкурсите за литературни и ликовни дела на тема „Белите мугри во светлината на денот“, на кои учествуваа ученици од повеќе основни и средни училишта во земјава.
Гран-при наградата на литератирниот конкурс ја доби Софија Ичкова, втора година од СОУ „Богданци“ од Богданци, а Гран-при наградата на ликовниот конкурс и беше доделена на Елена Ивчева, втора година од гимназијата „Кочо Рацин“ од Велес.
Во „Сокачето на поезијата“ пред Спомен-куќата на Рацин се одржа поетско читање на наградените творби. Учениците од повеќе училишта во земјава кои учествуваат на 52. Детски Рацинови средби во Спомен-куќа на Рацин ги разгледаа неговите предмети, грнчарската работилница и изложбата за Коста Солев Рацин.
Манифестацијата денеска во Велес продолжи со Поетски караван во градинките, основните и средните училишта и во Ученичкиот дом. Ќе заврши попладне во Ликовниот салон каде што ќе биде промовирана книгата за деца и млади „Приказни од мојот крај“ на Лила Арсова.