Библиотеката „Ал-Би“ од демирхисарското село Бабино промовира „Водич низ културното, уметничкото и гастрономското богатство на Демир Хисар“.
Станува збор за публикација, поддржана од Министерството за економија – Сектор за туризам и угостителство, со која се овозможува секој читател, посетител и турист да се запознае со како што вели издавачот Стево Степановски, со уникатната и недопрена убавина и да вкуси од демирхисарски специјалитети.
– Публикацијата е лесно читлива, во 40 страници на кои доминираат фотографии од селата Бабино, Слоештица, Смилево, Вирово, Жван, Железнец… манастирот во Слепче, цркви во демирхисарско и други објекти. Но, во публикацијата читателот може да прочита и за стариот даб кој се наоѓа во непосредна близина на манастирот Св. Петка, за изворите на Црна Река, потоа за валавиците по течението на Бела Река и други реткости, истакна Степановски.
Во „Водичот“ посебен дел е посветен на кулинарските богатства во демирхисарско и публикувани се рецепти за подготовка на Бакрданик, Ѓомлезе, Кашаник, Свирипиле, Макало со грав и суви пиперки и друга како што нагласи Степановски, вкусна храна позната за демирхисарското поднебје.