Штипските локални институции се подготвуваат за големата показна вежба или акција на координираност помеѓу општинските сили за заштита и спасување заедно со регионалните и државните сили за заштита и спасување при елементарни непогоди.
Градоначалникот на Општина Штип, Благој Бочварски како командант на општинскиот штаб за заштита и спасување денеска одржа состанок со членовите на овој штаб за активација на општинскиот план за заштита од поплави, мобилизација на цела ТППЕ како и просторната универзална единица за заштита и спасување, активација на јавните претпријатија „Исар“ и „Стипион“ на нивните оперативни планови за заштита од поплави и мобилизација на просторните единици наменети за заштита и спасување.
– Од денеска започнува симулација на показна вежба или акција на координираност помеѓу општинските сили за заштита и спасување заедно со регионалните и државните сили за заштита и спасување.Во наредните денови ќе се случува симулација на таква показна вежба со цел да спречиме што е можно повеќе проблеми коишто би настанале како потенцијална елементарна непогода , рече Бочварски.
Показната вежба ќе се случува во наредните денови во касарната „Јане Сандански“ во Штип. Во среда на 18 септември ќе се одржи генералната проба, а во четврток 19 септември ќе се случи настанот кадешто ќе се види подготвеноста на општинските и државните сили во касарната „Јане Сандански“ Штип. Општинскиот штаб за заштита и спасување располага со околу 150 луѓе на терен.
За чистење на каналите се ангажираат седум багери, пет камиони – кипери, еден утоварач и 13 луѓе за чистење на истите. Додека за изработка на заштитни насипи со песок на располагање се два утоварачи, два камиони и 30 работника за полнење на вреќи за песок.