Пред 56 години големиот часовник на Старата железничка станица во Скопје замрзна. Остана да сведочи дека 20 секунди беа доволни да запре животот на градот. Кога се спушти прашината и кога замре злокобниот звук светот ја виде катастрофата. Скопје се сеќава!, напиша премиерот Зоран Заев на „Твитер“ по повод 56-годишнината од катастрофалниот земјотрес во Скопје.
Во земјотресот во 1963 година животот го загубија 1.070 луѓе, а 3.000 беа повредени. Во неговата обнова се вклучија голем број држави поради што Скопје уште е познат и како „Град на солидарноста“.
Скопје секоја година го одбележува овој ден со низа манифестации. Денеска, официјални делегации и претставници на институции ќе положат цвеќе на Споменикот на жртвите од земјотресот на градските гробишта во Бутел, а традиционалната крводарителска акција ќе се спроведе од 9 до 17 часот во Домот на хуманитарни организации „Даре Џамбаз“.
Во Градскиот парк, кај Школка, вечер во 19:30 часот, со концерт на Градскиот мешан хор „Вардар“ ќе почне концертот со кој Град Скопје оваа година ќе го одбележи 26-ти јули. Потоа ќе следуваат Биг Бендот под водство на Љупчо Мирковски, поп ѕвездата Канита Сума, познатиот грчки хармоникаш Танос Ставридис, српската пејачка на изворни песни Биља Крстиќ и Влатко Стефановски.