Првото музичко училиште во земјава, велешкото ООМУ „Стефан Гајдов“, одбележа 73 години постоење. По тој повод мината вечер во салата „Бели Мугри“ во Велес учесниците и професорите го одржаа традиционалниот годишен концерт.
Најдобрите ученици од сите класи на пијано, флејта, виолина, виолончело, кларинет и гитара се претставија со познати дела од класиците на музиката, од Моцарт, Чајковски, Бах и други.
Настапи и хорот под диригенство на професорката Славица Ставрева и оркестарот составен од жичани и дувачки инструменти, под диригенство на професорите Златко Андреев и Роска Чукниева и Елена Георгиева.
Светлана Ташева директор на ООМУ „Стефан Гајдов“ во своето обраќање до присутните потсети дека учениците како и во изминатите и оваа учебна година учествувале и се добитници на многу домашни и меѓународни натпревари по музика.
За постигнатите високи резултати на полето на музицирањето,и достојно презентирање на музичкото училиште во земјава и странство, директорката Ташева им врачи благодарници од училиштето.