Министерка за одбрана Радмила Шекеринска денеска учествуваше на конференцијата „10 години Албанија во НАТО – посигурен регион” во Тирана во рамки на прославата по повод 10 годишнината од влегувањето на Република Албанија во НАТО..
Осврнувајќи се на политиката на Владата за реализирање на стратешка цел за нашата држава – членството во НАТО, Шекеринска, како што соопшти денеска МО, потсетила дека во 2008 и 2009 година заедно со Албанија се движевме кон НАТО, но, нагласила, тогаш патиштата ни се разделија.
– Тоа ни испрати два сигнали: прво дека стратешките цели се остварливи и дека политиката на отворени врати е реална. Но, од друга страна нè потсети дека ако се пропушти шанса, може да се случи да се пропушти една деценија, а тоа е токму она што ни се случи нам, рекла министерката.
Таа додала дека сепак земјата направи извонреден напредок што нè доведе до исполнување на една од стратешките цели – членството во НАТО.
– За година и половина, Владата успешно ја врати земјата во евроатлантскиот пат, направи сериозни реформи во одбраната, како и уште потешки политички реформи, што подразбира значителна инвестиција во добрите меѓуетнички односи. Се справивме со најтешките проблеми, а во минатото тоа беа односите со нашите соседи – прво со Бугарија, а потоа и со Грција. Вреди да се спомне фактот дека успеавме да пронајдеме решенија за долгогодишниот спор со Грција, а ова покажува дека во регионот не само што можеме да гледаме напред, туку можеме да бидеме креативни за изнаоѓање на решенија за дури и најтешките проблеми, истакнала Шекеринска.
Таа се заблагодарила за силната поддршка од Албанија во процесот на пристапување, како и за брзата ратификација на пристапниот протокол за членство на Северна Македонија во Алијансата.
Најпозитивно, подвлекла, беше тоа дека соседните земји во многу брзи и ефикасни процедури го ратификуваа пристапниот договор, а тоа кажува дека регионот научил од своите грешки.
– Повеќе не се гледаме себеси како непријатели, туку како најблиски сојузници. Вчера ја добивме и добрата вест од Вашингтон, дека Белата Куќа го доставила предлогот и извештајот за ратификација на пристапниот протокол во Сенатот на САД, истакнала министерката за одбрана.
Членството во НАТО, потенцирала таа, отвора нови перспективи, но и одговорности кои сме подготвени да ги преземеме. Информирала меѓу другото дека Владата одлучи да го зголемува буџетот за одбрана секоја година за 0.2 проценти до 2024 година.
– Ние бевме дел од мисиите на НАТО заедно со Италија и со претставници од земјите од групата А5 во регионот во минатото. Повеќе од 4.000 наши војници инвестираа во глобалната безбедност во операциите предводени од Алијансата, додала министерката.
Во однос на економскиот ефект од членството во Алијансата, Шекеринска истакнала дека минатата година кога беше потпишан пристапниот протокол, странските директни инвестиции се зголемиле за четири пати, споредено со 2017 година, односно тие се два пати поголеми од досега најдобрите години според прилив на странски директни инвестиции.
Честитајќи и уште еднаш на Албанија, Шекеринска рече дека регионалната стабилност и безбедност се во преден план на НАТО и изрази задоволство што и нашата земја станува контрибутор во мирот и просперитетот на Балканот.
На конференцијата покрај домаќинот, албанската министерка Ољта Џачка, учествуваше и италијанската министерка за одбрана Елизабета Трента.
Во рамки на прославата албанското Министерство за одбрана за многубројните гости приреди воена парада и други свечени активности по повод десетгодишното членство во Алијансата.