Заврши првата фаза од реконструкцијата на ученичкиот дом во Средното општински училиште(СОУ) „Кочо Рацин“ во Свети Николе. Градоначалникот на Општина Свети Николе, Сашко Велковски информира дека деновиве во домот веќе е пристигнат новиот инвентар, чија вредност изнесува околу 850.000 денари.
–Инвентарот вклучува нови кревети, со нови душеци, нови работни масички и столчиња, како и нови шкафчиња. Средното земјоделско училиште доби и нов трактор, што е неопходен за практична настава за средношколците. Комплетната реконструкција на ученичкиот дом и едната учичишна зграда се очекува да почне во мај. Ова е еден од капиталните проекти, што се финансираат од Програмата на Министерството за образование, вели Велковски.
За новата учебна 2019-2020 година најавени се и нови наставни програми во средното земјоделско училиште, што ќе бидат поатрактивни за идните средношколци од источниот регион.
Во моментов во ученичкиот дом се сместени 15 ученици, но со опремувањето и целосната реконструкција се очекува овој број да се зголеми, а исто така се очекува и да се потпише и меморандум за соработка со Славјанскиот универзитет, со цел и студентите да ги користат услугите на домот.