Влада: Иванов го прекрши Уставот, парламентарната демократија мора да функционира

 Донесувањето на Законот за употреба на јазиците во Република Македонија и Законот за ратификација на Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување на стратешко партнерство меѓу страните (Договорот од Преспа), е во целосна надлежност на Собранието на Република Македонија, се наведува во соопштението од владината прес-служба.

Од Владата на Република Македонија ја поддржуваат одлуката двата закони да бидат објавени во „Службен весник на РМ“ со потпис на претседателот на Собранието, имајќи го предвид прекршувањето на Уставот од страна на претседателот Ѓорѓе Иванов.

-Иванов беше должен да го потпише указот за прогласување на двата закони, а кога тој одлучува да го крши Уставот, неопходно е да се преземат мерки кои се во согласност со Уставот за да продолжи да функционира парламентарната демократија, се наведува во соопштението од Владата.

Оттаму посочуваат дека, според член 51, став 2 од Уставот на РМ, секој е должен да ги почитува Уставот и законите и тоа е обврска и за претседателот на државата.

Членот 75, став 3 од Уставот на РМ, како што велат од Владата, е јасен „претседателот на државата е должен да го потпише указот за прогласување на законите што ги носи Собранието на Република Македонија, доколку тие по втор пат се донесат со потребното мнозинство во законодавниот дом, односно Собранието“.

-И двата закона, Законот за употребата на јазиците во Република Македонија и Законот за ратификација на Договорот од Преспа, се усвоени по втор пат со потребното мнозинство во Собранието на Република Македонија. Законот за употреба на јазиците во март оваа година, а Законот за ратификација на Договорот од Преспа на 5 јули, исто така оваа година. Согласно уставните одредби, а поради неизвршување на обврските на претседателот на државата, на претседателот на Собранието на Република Македонија единствено што му преостана е да ја исполни должноста што произлегува од Членот 52 од Уставот, согласно кој  законите што по втор пат се донесени со потребното мнозинство во законодавниот дом треба да бидат објавени во „Службен весник на РМ“, 7 дена по нивото донесување, стои во соопштението.

Од Владата на Република Македонија сметаат дека со оваа постапка претседателот на Собранието на РМ ја запре тенденцијата една церемонијална постапка на претседателот на државата да се претвори во преседан кој се закануваше да го блокира функционирањето на системот и тоа со кршење на Уставот со оглед на фактот дека, според заедничкото читање на Член 75 и на Член 52  од Уставот, претседателот на државата е должен да потпише указ секогаш кога Собранието по втор пат одобрува донесување закон.

Владата на Република Македонија во соопштението потсетува дека претседателот на државата, не е законодавно тело, и дека тој бил повикан повеќе пати да го почитува Уставот и да постапи согласно законските обврски, и укажува дека иницијативата на претседателот на Собранието на РМ ги враќа постапките предвидени за вакви случаи назад во рамката што ја определува Уставот и законите .

 

Leave a Reply

Your email address will not be published. Required fields are marked *