Во Собранието вчера беа излагасани две функции на кои се чекаше подолг период – Љубомир Јовески беше избран за државен јавен обвинител, а д-р Венко Филипче – за нов министер за здравство. Гласањето се одржа без присуство на пратениците од опозицијата.
Постапката за избор на нов јавен обвинител на РМ почна летото кога во Парламентот на 17 август беше разрешен Марко Зврлевски. Процесот беше стопиран поради кампањата и Локалните избори, а во меѓувреме таа функција ја извршуваше Лилјана Спасевска.
Јавниот обвинител има мандат од шест години со право на повторно именување. Шеесет и тригодишниот Јовески во своето досегашно работење постапувал во кривичната област. Повеќе од 15 години работел како судија по кривични предмети, а во еден мандат раководел со Основниот суд Скопје 2. Има и работно искуство од над 12 години како јавен обвинител и седум години во областа на извршување на кривичните санкции. Од 2015 година е член на Советот на јавните обвинители на РМ.
Во свечената изјава Јовески се обврза дека ќе го почитува Уставот и законите и оти ќе работи чесно, совесно и непристрасно. Ќе работи на враќањето на довербата на граѓаните во Јавното обвинителство.
– Пред голем предизвик сме да ја вратиме загубената доверба во работата на Обвинителството пред граѓаните и да се профилира како професионална институција што ќе ги гони сторителите на кривични дела. Затоа ќе работам Обвинителството да ја зашитува законитоста и да обезбедува владеење на правото во Република Македонија, изјави Јовевски.
Пратениците од владејачкото мнозинство вчера на собраниска седница го изгласаа и новиот министер за здравство – д-р Венко Филипче. СДСМ го презеде ресорот здравство по повлекувањето на Арбен Таравари од Алијансата за Албанците поради кандидатурата за градоначалник на Гостивар.
Преговорите за прв човек во здравство траеја повеќе од еден месец. Премиерот Зоран Заев донесе одлука министер за здравство да биде од СДСМ што предизвика реакција од лидерот на Алијансата за Албанците Зијадин Села, кој настојуваше неговата партија да го задржи ресорот доведувајќи го во прашање и натамошното учество во владината коалиција. Но, според Заев, Алијансата претходно го добила тој ресор поради кандидатот Таравари, а овојпат како на млада партија и понуди место потпретседател на Владата за реформи.
По изборот на Филипче во Парламентот, Села и неговиот сопартиец Сурија Рушити ја напуштија собраниската седница. За медиумите Села изјави дека неговата партија ќе остане во владината коалиција до донесувањето на законот за употреба на јазиците.
Новиот министер за здравство, д-р Венко Филипче (Скопје, 1977), дипломирал на Медицинскиот факултет во Скопје во 2001 година, специјализација по неврохирургија почнал во 2003 година а ја завршил во 2008 година. Докторирал во 2015-та, а оваа година е избран за доцент на Медицинскиот факултет. Во 2012 година завршил фелоушип по интервентна неврорадиологија со што станал прв неврохирург во околните земји кој ја основа хибридната неврохирургија на Клиниката во Скопје.
Покрај него, на седницата во Парламентот вчера беа изгласани уште три нови членови во Владата на испразнетите места: Аксел Ахмедовски – министер без ресор задолжен за спроведување на Стратегијата на Ромите, Благе Цветковиќ – заменик-министрер за земјоделство, шумарство и водостопанство и Арбр Адеми – заменик-министер за образование и наука.
На вчерашната собраниска седница, исто така, беа констатирани оставките на претседателот на Државната изборна комисија Александар Чичаковски, потпретседателот на ДИК Реџеп Прекопуца и на членовите на ДИК Атанас Урумов, Игор Милев, Субхи Јакупи, Виолета Дума, Сашо Срцев и Силвана Бонева. Ним им престанува функцијата и ангажманот во ДИК на лично барање, а пред истекот на мандатот.
Овој состав на ДИК кој имаше мандат од склучувањето на Пржинскиот договор па се до 2020 година, се повлекува по критиките во јавноста за делење високи бонуси.
Сите членови на комисијата, освен најновиот од партијата БЕСА – Ермира Асани-Салија, се повлекоа од функциите во овој највисок изборен орган, откако американскиот амбасадор Џес Бејли обзнани дека членовите на ДИК си поделиле високи надоместоци за својата работа за време на локалните избори и последните неколку изборни циклуси.
На интернет-петицијата со која се бараа оставки од деветтемина членови на ДИК се потпишаа над 5.000 лица.