Не треба да се плашиме од ниту една реформа што ќе биде исцрпена со дебата. Персоналниот данок на доход е владина програма, а тоа значи дека ќе се спроведе, рече денеска премиерот Зоран Заев, одговорајќи на новинарско прашање во врска со најавеното прогресивно оданочување.
Владата, нагласи Заев, сака правично и фер општество. Не може некој што има плата 10.000 денари да плаќа ист данок со некој што зема 10.000 евра.
– Ние не сме слепи имплементатори на нешто што сме ветиле и ни стои во некој документ. Целта е да се постигнат ефекти и бенефит за сите. Затоа, преку дебата ќе ја одредиме границата на другата стапка што ќе биде воведена, рече Заев.
Во дебатата, нагласи, треба да се вклучат бизнис заедницата, младите, здруженијата на потрошувачите,…
– Не ги брзаме работите. Отвораме дебата која треба да доведе до најисправно решение. Да оставиме луѓето да се изјаснат, институциите да изнесат аргументи. Ние сме левичари и веруваме во праведно оданочување, подвлече премиерот.