Премиерот Зоран Заев денеска оствари средба со добитничката на Нобеловата награда за мир за 2015 година, Уидед Бушамауи.
Поздравувајќи ги напорите и заложбите за промени во нејзината земја Тунис, премиерот Заев истакна дека Бушамауи е пример за тоа дека искрените заложби за промени во едно општество не се залудни.
Имајќи ги предвид долгогодишните ангажмани и заложбите за возобновување и помирување на туниското општество, Заев и Бушамауи во текот на средбата разговараа и за искуствата на нобеловката во обновувањето на општеството после преживеаните кризни времиња, зајакнувањето на капацитетот на институциите, предизвиците во привлекувањето на странски инвеститори, мултикултурализмот, влијанието на квалитетот на образованието и отворањето нови работни места, како неопходни фактори во градењето постабилно општество.
Бушамауи, во текот на средбата ја нагласи и важноста од прифаќањето на различностите, еманципацијата на жените во општеството и меѓусебниот дијалог како клучни за зачувувањето на демократијата, и социјалната стабилност, за граѓаните да можат да добијат подобар живот и посигурна иднина, соопшти владината прес-служба.
Осврнувајќи се на својот придонес во возобновување на туниското општество таа кратко рече „ние се обединивме за иднината на Тунис и успеавме таму каде што политичарите не успеаја“.
Во текот на средбата, премиерот Заев и Бушамауи, која меѓудругото била и прва жена претседател на стопанската комора на Тунис се согласија дека оваа средба е одлична можност за идна комуникација за натамошни иницијативи за проширување на соработката помеѓу Република Македонија и Тунис.
Уидед Бушамауи е добитничка на Нобеловата награда за мир за 2015 година во конкуренција на 273 кандидати.