Општина Штип го прифати предизввикот и во услови на пандемија нема да ја прекине традицијата за организирање на Фестивалот за музика „Макфест“. На денешната прва прес-конференција во Општинскиот Мултимедијален центар „Киро Глигоров“, заменик градоначалникот на Општина Штип, Јане Миланов и екипата која работи на организација на фестивалот најавија дека првпат ќе се одржи на отворено и тоа на Градскиот плоштад „Слобода“.
– Макфест“ е бренд кој остави во наследство над 1.000 композиции и воедно останува најголем промотор на музика уште од своите почетоци. Годинава фестивалот ќе се реализира во услови на светска пандемија и на заштитните мерки и протоколи согласно препораките, а тоа е најголемиот предизвик. И во минатото имало бројни предизвици, но биле успешно совладани, така што не се сомневам дека и оваа година ќе имаме успешен фестивал, вели Миланов.
Техничкиот директор на „Макфест“, Кирил Панајотов рече дека Фестивалот ќе се одржи на 18 и 19 септември, првата вечер е ревијална на која ќе настапат осум музички имиња, дел победници, а дел познати имиња од годините наназад, додека втората вечер ќе биде натпреварувачка и ќе настапат 24 изведувачи. Меѓу изведувачите оваа година се Александар Митевски и Драган Спасов-Дац, Димитар Андоновски, Биба Додева, Нокаут, Ѓоко Танески и други. Освен познати имиња кои настапувале на фестивалот, ќе има и дебитанти.
Наградите остануваат исти како и претходните години, 5000 евра за прво место, 3000 евра за второ и 1000 евра за трето место. Ќе се доделат и наградите за најдобар аранжман, за најдобар сценски настап и за дебитант во висина од 500 евра, а нема да се додели наградата за најдобра интерпретација бидејќи фестивалот ќе биде на плејбек. Причина за ова, според техничкиот раководител Кирил Панајотов, е заштитниот фактор односно неможноста да се менуваат 24 микроофони.
– Според протоколот за заштита, потребно е посебен микрофон за секој изведувач. Не постои таква техничка можност и затоа одиме на плејбек, додека првата вечер, на ревијалниот дел, имаме осум изведувачи и тоа е изводливо, напомена Панајотов.
Шоу програмата е на Игор Џамбазов и Гуру Харе, кои ќе настапат по завршувањето на натпреварувачкиот дел, додека публиката гласа. Кога сме кај гласањето, ќе гласа публиката, согласно протоколот и заштитните мерки, а дел од гласачкиот сегмент не се открива, за да се избегне можноста за манипулации. Истиот ќе биде објавен на денот на фестивалот. Драган Ристов шеф на прес-центарот додаде дека на градскиот плоштад „Слобода“ ќе бидат поставени столчиња согласно препораките на растојание од 1,5 метар, а се прават пресметки колку е капацитетот на плоштадот во согласност со здравствените протколи.
Движењето на плоштадот, ќе биде ограничено со две акредитации, црвена и зелена. Новинарите ќе имаат посебно место, до сцената, кое ќе биде еден вид прес центар и ќе го следат фестивалот согласно протоколот:
– Секој изведувач, ќе биде достапен за изјава, а сите останати активности, ќе бидат во координација со лицата од прес центарот. Ве повикувам да помогнете во што поуспешно спроведување на фестивалот. Да се заштитиме самите себе, да ги заштитиме другите и секако фестивалот. Да покажеме дека Штип и „Макфест“ знаат и умеат да направат фестивал каков што заслужува, вели Ристов.
Годинава, поради коронавирусот, ќе го нема традиционачлниот коктел и сечењето на торта. Единствен предизвик се временските прилики, доколку заврне дожд интерпретаторите си продолжуваат со настапите, бидејќи тој дел од плоштадот ќе биде покриен.