Општина Македонска Каменица и Културно-информативниот центар „Романса” како организатори на традиционалната средба со иселениците и годинава го организираат настанот „Ден на дијаспората 2019“, што ќе се одржи на 12 август во манастирско-туристичкиот комплекс, „Еленец“ во селото Цера.
Од општината информираат дека годинава првпат во рамки на иселеничката средба ќе се организира и бизнис форум.
– На овој бизнис-форум со стопанственици и нашите иселеници ќе разговараме за искористувањето на потенцијалите со кои располага општината. За таа цел ќе ја презентираме програмата со предвидените мерки за развој, со кои заеднички се надеваме дека ќе обезбедиме брз развој на Македонска Каменица, во урбана и модерна општина, информираат од Општината.
Посочија дека на бизнис форумот освен иселениците и бизнис секторот ќе учествуваат и претставници на Владата.
Во рамки на културно-уметничката програма што ќе се одржи во манастирскиот комплекс „Еленец” ќе настапи локален бенд и естрадната уметничка Даниела Темелковска.
Иселеничката средба во Македонска Каменица како иницијатива првпат почна да се организира во 2014 година.