Официјален Париз ја поздрави ратификацијата на Договорот од Преспа од страна на грчкиот Парламент, јавува дописникот на МИА.
За францускиот претседател Емануел Макрон „гласањето на Договорот од Преспа е пример за храброст и единство на Европа“, напиша тој на Твитер
Министерот за Европа и надворешни работи Жан Ив Ле Дриан преку официјално соопштение порача дека го поздравува „гласањето од грчкиот Парламент на законот за ратификување на Преспанскиот договор за името на Поранешната Југословенска Република Македонија“ и додава дека „оваа политичка етапа суштински ќе овозможи стапувањето во сила на овој историски договор да има за цел ставање крај на билатералниот спор стар четвртина век“, додава тој.
Притоа Ле Дриан ја поздравува храброста на лидерите и особено премиерите на двете земји:
„Сакам да ја поздравам храброста и одлучноста што ја покажаа грчките и македонските лидери, особено премиерите Ципрас и Заев.“
Договорот од Преспа, според Париз „ќе овозможи развој на односите меѓу двете земји во многу области и ќе ја зајакне стабилноста на регионот на Западен Балкан и на Европа како целина.“
Париз притоа ја нагласува и поддршката на Франција за зачленување на Македонија во НАТО.
„Дополнително, со поддршка на Франција, договорот го отвора патот за пристапување на “Република Северна Македонија” во Атлантската алијанса, во согласност со поканата упатена до неа на самитот минатиот јули и придонесува за нејзиното европско приближување“ – се вели во соопштението на Кеј Д’Орсеј.