Министерот за локална самоуправа Сухејл Фазлиу, амбасадорката на Србија во Македонија, Душанка Дивјак Томиќ и градоначалникот на Куманово, Максим Димитриевски на денешниот состанок разговараа за последните подготовки за отворање канцеларија во Куманово за имплементација на ИПА Програмта за прекугранична соработка меѓу Македонија и Србија.
Како што соопшти Министерството за локална самоуправа, на состанокот на кој присуствуваа оперативните структури од двете земји, министерот Фазлиу и амбасадорката Дивјак Томиќ, му се заблагодариле на градоначалникот Димитриевски за поддршката што ја дава општината со отстапување на канцеларија за потребите на Програмата.
Програмата за прекугранична соработка со Србија е нова програма, која ќе биде финансирана со средства од ИПА инструментот на Европската Унија и кофинансирана со средства од буџетот на државата.
Во соопштението е наведено дека во завршна фаза е процесот на воспоставување на заедничките технички тела, а се подготвува и првиот повик за проекти на кој што ќе можат да аплицираат општини, граѓански организации и други непрофитни субјекти од двете земји.
Заради успешно спроведување на програмата во тек се обуки за подготовка на проектна апликација за потенцијалните апликанти, а исти такви обуки ќе бидат организирани и за заинтересираните субјекти во Србија.