Комисијата за демократско партнерство на Претставничкиот дом на Конгресот на САД во писмото адресирано до премиерот Зоран Заев упатува охрабрување за пристапување кон уставните измени кои се неопходни за спроведувањето на Договорот од Преспа и покрај предизвиците по референдумот, меѓу кои и отворените и прикриените руски напори да го поткопаат Договорот.
Писмото, кое го прими македонскиот премиер, е потпишано од Питер Роскам, претседавач од Републиканската партија, и Дејвид Прајс, заменик-претседавач од Демократската партија, а е испратено во име на 20 конгресмени, републиканци и демократи.
Конгресмените од оваа Комисија, чиј мандат е да соработува со земјите партнери на САД за развој на ефикасни и одговорни институции, во писмото до премиерот Заев и до Владата изразуваат честитки за големото мнозинство гласови „за“ на референдумот и нагласуваат дека американскиот Конгрес останува цврсто со граѓаните на Република Македонија во нивните аспирации за членство во НАТО и ЕУ.
– Демократијата не е само одржување слободни и фер избори, туку она што се случува меѓу два изборни циклуса. Сега е време светот да ја види енергијата на демократијата во Македонија, преку потврдување на волјата на гласачите за нивно поврзување со западниот свет, се вели во писмото.
Американските конгресмени нагласуваат дека спорот за името со Грција предолго стоеше на патот на евроатлантските интеграции кои значат придобивки за македонските граѓани и дека е време ваквите спорови да се стават настрана, преку заложување за конечен напредок.
Потписниците на писмото истакнуваат дека Конгресот на САД останува и понатаму посветен на билатералните односи меѓу двете земји и инспириран од демократскиот пат по кој одат граѓаните на Република Македонија.