Жителите на Преспа повторно излегоа на протести и блокади против, уништувањето на природните ресурси во регионот. Иницијативата „Зелена народна стража“ информира дека вчера, 16 август, во селото Љубојно се одржаа блокади на патот што води кон шумата каде се врши сеча.
„Сложно и сѐ е можно! Кога народот го брани својот дом, ни еден потпис од некој си надлежен не може да застане на патот,“ стои во соопштението на иницијативата.
Активистите алармираат дека, покрај масовната сеча, Преспа се соочува и со пресушување на Брајчинска Река како последица од мини-хидроцентрала, како и со ризик за Галичица и Преспанското Езеро.
„Нашата света земја, за која нашите предци гинеле и ја бранеле, некои сакаат да ја уништат за неколку години!“, порачуваат од иницијативата.
Додека тие се обидувале да го заштитат својот дом, истуриле песок за да го блокираат патот што води до сечата, властите реагирале со парични казни од 600 евра за истурање отпад.
„Додека чесните луѓе си го бранеа домот, власта одлучи да ги казни со 600 евра, по основ дека истуриле отпад – песок!“, стои во нивната реакција.
Граѓаните се цврсто решени да не се откажат од заштитата на својата природа и дом.
„Мораме да си го браниме и она малку што ни остана, бидејќи ни се заканува еколошка катастрофа. Нема да молчиме, ќе живееме во здрава животна средина, дома!“