Министерот за надворешни работи и надворешна трговија Тимчо Муцунски од денеска до петок ќе престојува во посета на Брисел, во чии рамки ќе учествува и на дводневната средбата на шефовите на дипломатиите на земјите членки на НАТО.
Денеска, на првиот ден од посетата, Муцунски ќе се обрати на настанот „Проширувањето на ЕУ во новата ера: перспективата на Северна Македонија“ во организација на бриселскиот Центар за европска политика (ЕПЦ) и ќе има брифинг со претставници на бриселски тинк-тенкови посветен на тековниот евроинтегративен процес.
Како што најавија организаторите на настанот, предвидено е Муцунски да говори за состојбата и перспективите на патот на македонската европска интеграција, како и да ги „расветли очекувањата на земјата од ЕУ во однос на досието за проширување во овој критичен геополитички момент“.
– Северна Македонија бара поголема предвидливост во овој процес. Земјата целосно се усогласи со заедничката надворешна и безбедносна политика на ЕУ и ја поднесе Реформската агенда за Планот за раст. Сепак, нејзиниот напредок кон членството во ЕУ продолжува да биде попречен од инструментализацијата на процесот на пристапување од страна на земјите членки, се додава во најавата на настанот на кој ќе говори министерот Муцунски.
Утре и в петок, пак, Муцунски ќе учествува на средбата на министрите за надворешни работи на земјите членки на НАТО, на која главни теми ќе бидат состојбите во Украина, зголемувањето на трошоците за одбраната и улогата на Алијансата во зајакнувањето на одбранбената индустрија.