Претседателот на Сојузот на стопански комори на Македонија, Трајан Ангелоски и потпретседателите Орце Симов, Сашо Дукоски и Аркан Керим, беа домаќини на голема делегација на турски бизнисмени од Стопанската и индустриска комора на Чорлу, Турција, предвидена од претседателот Изет Волкан. На средбата се дискутираше за можностите за унапредување на економската соработка, со фокус на инвестиции, информираат денеска од Сојузот на стопански комори на Македонија.
Претседателот на Сојузот, Ангелоски истакнал дека меѓу двете држави веќе е изградена блиска билатерална и динамична соработка на сите нивоа, што се смета за предност што може да се искористи и за воспоставување на директни релации меѓу бизнис заедниците.
– Република Турција постојано е меѓу нашите најзначајни трговски партнери и континуирано инвестира во македонската економија. Во релациите и комуникациите што се воспоставени меѓу бизнис заедниците од двете земји, секогаш воодушевува високо професионалниот пристап во работењето на турските компании, смета Ангелоски.
Според него, унапредувањето на економската соработка помеѓу двете земји е од особено значење за развојот на поширокиот регион на Југоисточна Европа, бидејќи пазарот во нашата држава е тесно поврзан со пазарите во Србија, Бугарија, Косово, но е близок и со пазарот на ЕУ.
– Претставниците на турските компании, кои доаѓаат од различни стопански сектори, ги претставија своите деловни активности и изразија голем интерес за воспоставување на нови контакти и соработки. Тие истакнаа интерес за инвестирање во нашата земја, но и мислење дека постои потреба од поедноставување на процедурите. Изразија и подготвеност да се организира и настан за претставување на можностите за инвестирање пред пошироката бизнис заедница во Чорлу. Стопанската и индустриска комора на Чорлу е една од најстарите бизнис организации во Турција и има околу 10.000 членови-компании, активни во сите економски сектори, се наведува во соопштението.
Како што се додава во соопштението, претставниците на двете комори споделиле заеднички заклучок дека постои голем потенцијал за интензивирање и продлабочување на досегашната соработка меѓу бизнис-заедниците, особено во делот на енергетиката, автомобилската индустрија, иновациите, новите технологии.
– Коморите заеднички ќе работат на меѓусебното поврзување, размена на искуства, контакти, заедничко инвестирање, со цел создавање на производи со повисока додадена вредност и овозможување на повисок раст и развој на двете економии, се посочува во соопштението.