Поставени се темелите за интензивирање на одбранбената соработка меѓу двете земји – сојузнички во НАТО, Северна Македонија и Словачка, со што ќе се развијат и националните, но и капацитетите на Алијансата за колективна одбрана, беше истканато на средбата меѓу министерката за одбрана Радмила Шекеринска и нејзиниот словачки колега Јарослав Над, која се одржа во Братислава.
Двајцата министри заклучија дека полноправното членство на Северна Македонија во Алијансата ја зацврсти регионалната безбедност, а сега, како што рекоа, е потребно да се направи и долгоочекуваниот и заслужен исчекор во европската интеграција на земјите од Западниот Балкан.
Министерката Шекеринска истакна дека членството на земјава во Алијансата е придобивка за безбедноста на целиот регион. Таа порача дека почетокот на пристапниот процес за членство на Северна Македонија во Унијата ќе ги зацврсти европските вредности и ќе овозможи земјата и регионот да продолжат да се развиваат согласно европските вредности, и истовремено ќе им стави крај на обидите за други неевропски влијанија.
Министерот Над изрази отворена и јасна поддршка за почетокот на пристапните преговори за Северна Македонија, укажувајќи на тоа дека земјата го испорача она што го вети и дека позитивна одлука на Европската Унија ќе ја потврди кредибилноста на пристапниот процес.
Во контекст на одбранбената соработка, министрите Шекеринска и Над укажаа на отвореноста на двете земји за нејзино интензивирање, имајќи предвид дека и Северна Македонија и Словачка цврсто веруваат дека единството во НАТО, меѓусебната поддршка во развојот на одбранбените капацитети и цврстата определба за колективна одбрана се темелите за одржување на безбедноста и просперитетот во евроатлантската област.