Вклучувајќи се во акцијата, Македонско друштво „Илинден“-Тирана, упати апел секој кој колку може да донира средства за операција на Васил Јанкула, кој поради неговата храброст и покрај болеста, познат е како преспански херој.
Васил Јанкула(29), Македонец од Албанија роден е во селото Туминец, Мала Преспа.
Боледува од церебрална парализа поради породилна траума по време на породувањето и од таму и асфиксија. Оваа болест полека почнала да биде негова препрека во животот. Но, и покрај ова опака болест позитивен дух и животен ентузијазам секогаш го водеа напред. Не сакајќи болеста да го изолира и со желба да напредува во животот како и сите нормални луѓе, избра попреченоста да не го спречи активно да спортува.
– Велосипедизмот е мојот втор живот, мојата преродба која ме прави среќен и ми создава голем адреналин, како и желба за нови и невозможни предизвици. Покрај болеста, сепак јас сум позитивен и не дозволувам негативните мисли да ме победат. Благодарение на мојот ентузијазам во 2018 година одлучив поактивно да спортувам и почнав да возам трицикл на различни настани и маратони, под едно мото „Сите сме исти“. Одлучив да направам еден подвиг и со мојот трицикл да ја поминам Македонија. Успеав да ја реализирам зацртаната маршрута и така станав познат како преспански херој, вели Јанкула.
Во 2019 година со трицикл успеал да извози 3.000 километри за три месеци, што, како што вели, го направило среќен и успешен. Но, за жал, наскоро по овие достигнувања, неговото здравје почнало драстично да се влошува.
Лекарите му дијагностицирале детска церебрална парализа – Спастична Квадриплегија. Тоа е најтешката форма на церебрална парализа која влијае на целото тело, на главата, и на рацете и на двете нозе, без ментална ретардација, меѓутоа со говорна попреченост.
– Поради тоа потребна е итна операција а за целиот третман и операции во странство потребни се 35.000 евра. Бидете хумани! Секому може да му се случи, апелира МД „Илинден“.