Заменик-министерот за труд и социјална политика Ѓонул Бајрактар денеска изјави дека не е донесена одлука од понеделник сите вработени лица да користат колективен одмор, како еден од мерките за справување со коронавирусот и оти тие ќе се креираат согласно потребите.
– Во моментот нема таква одлука. Кризниот штаб ја следи состојбата и мерките ќе ги креира согласно потребите што ќе се појават овие денови, изјави Бајрактар одговарајќи на новинарско прашање.
Заменик-министерот најави дека од понеделник ќе се исплаќаат парите за туѓа нега и родителски додаток за дете, кои доцнеле три месеци, и дека во никој случај не се стопирани овие права. Бајрактар објасни дека во изминатиот период се вршело обнова на документацијата за туѓа нега и родителски додадок за дете и оти денеска се потпишани документите.
Засега, според него, МТСП нема информација колку вработени од почетокот на кризата со Ковид-19 се отпуштени од работа и дали е зголемен бројот на лица баратели на социјална заштита, бидејќи во тек е периодот за аплицирање за социјална помош.
– Во моментот не знаеме колку добиле отказ. Аплицирањето се случува во април. Очекуваме зголемен број апликанти, рече Бајрактар, кој најави дека бројката ќе се знае откако ќе заврши аплицирањето.
Дополнителната министерка за труд и социјална политика Санела Шкриељ, пак, информираше дека во нивниот регистар се заведени 239 бездомни лица и оти МТСП е координирано со МВР за да им се помогне на овие лица за време на кризата со коронавирусот и полицискиот час.
– Нашите тимови, кои се и понатаму достапни 24/7 координирано настапуваат заедно со припадниците на МВР. На бездомните лица им се обзбедува храна, здравствена заштита и хигиенски продукти, изјави Шкриељ.
МТСП и Црвениот крст, потсети дополнителната заменик министерка, во изминатиот период обезбедија зголемени капацитети за сместување на бездомните лциа и притоа се отворени четири регионални пункта. Центрите за социјална работа, работат постојано и нивни тимови се достапни 24 часа.