Силна поддршка за продолжувањето на реформите, за почитувањето на Преспанскиот договор и добрососедските односи, за политиките на дијалог, во пресрет на очекувањата за напредок во евроинтеграциите, искажале резидентни амбасадори од земјите членки на Европската Унија во Република С. Македонија на денешната средба со премиерот Оливер Спасовски.
Како што соопшти владината прес-служба, на средбата биле изразени честитки до премиерот Спасовски и до Владата за доследното спроведување на обврската од Пржинскиот договор и формирањето преодна Влада, три месеци пред изборите, што се препознава од страна на ЕУ, како зрелост на демократијата во земјава.
На состанокот силно биле поздравени заложбите на премиерот Спасовски и на Владата за продолжување на реформите, за продолжувањето на дијалогот со опозицијата, за јасните определби од Владата за почитување на добрососедските односи и договорите со Република Грција и Република Бугарија, за спроведување фер избори, што се од значење за стабилноста на граѓаните и нашата држава и за интеграциите во НАТО и кон ЕУ.
Оценето било дека ова се значајни обврски, сериозно сфатени од Владата, која функционира со полн капацитет, какви што се државните потреби, во овој клучен период кога Република С. Македонија очекува да стане полноправна членка на НАТО и оствари напредок во евроинтеграциите. Изразено е очекување дека на тоа ниво на одговорноста ќе бидат сите политички субјекти во земјава.
На средбата, како што стои во соопштението, потврдено било дека Република С. Македонија ги спроведе потребните реформи е оценето дека фокусот кон нивната натамошна реализација е позитивен сигнал кон земјите членки на ЕУ, за цврстата определеност за усогласување со европските стандарди и вредности.
Посочено било дека во следните месеци Западен Балкан повеќе од секогаш ќе биде во фокусот на Европската Унија, како и дека проширувањето на ЕУ останува на врвот на европската агенда.
-Благодарни сме на поддршката и на пораките на политичките лидери на вашите земји дека одлуката за почеток на пристапните преговори со нашата земја треба да се донесе и што проширувањето на ЕУ се држи високо на агендата на европските институции, истакнал Спасовски.
Премиерот на состанокот со амбасадорите посочил дека врвен приоритет на сите министри во актуелната Влада е да се обезбеди континуитет на функционирањето на институциите, на владеењето на правото и демократијата, организирање фер и демократски избори.
– Врвен приоритет на Владата е и почитувањето на Преспанскиот договор со Република Грција и на договорот со Република Бугарија и истакнувам дека остануваме посветени на добрите односи со сите соседи, рече премиерот Спасовски.
На средбата било констатирано дека носењето на Законот за јавно обвинителство, иако не е услов за евроинтеграциите, ќе биде добра порака за определеноста на сите политички субјекти во земјава кон дијалог и кон владеење на правото.
Нагласено било дека во важните моменти за државата е недозволиво политиканство од кој било претставник на извршната власт или од политичките субјекти и дека е неопходно, сите во земјава, државните приоритети да ги стават во прв план.
-Состанокот на претседателот на Владата Спасовски со резидентните амбасадори од земјите членки на ЕУ во нашата држава е поздравен како значајна порака за определбата на Владата да продолжи одблиску да соработува со државите членки на ЕУ и со институциите на Европската Унија, во време на очекувањето на заслужениот исчекор во европските интеграции, се наведува во соопштението .