Нема сомнеж дека во последните неколку години, сајбер заканите се меѓу најзначајните безбедносни закани врз современите општества, што е основна причина истите да се третираат како интегрален дел од националната и меѓународната безбедност, истакна министерот за внатрешни работи Оливер Спасовски, во своето обраќање на меѓународната министерска Конференција посветена на темата – “Високотехнолошки криминал и информатичка безбедност“ што денеска и утре се одржува во Белград во организација на спрското Министерство за внатрешни работи.
Како што соопшти МВР, презентирајќи ги активностите што македонската полиција, но и другите надлежни институции ги превземале и превземаат во оваа област, Спасовски посебно ги посочи нормативните промени целосно хармонизирани и во соработка со ЕУ, како и Националната страгија за сајбер безбедност 2018 – 2022 година, која што служи како патоказ за развој на сигурно, безбедно, доверливо и отпорно дигитално окружување, поддржано од квалитетни капацитети, кои се базираат на доверба и соработка во полето на сајбер безбедноста.
– Нашето министерство се фокусира на развивање на капацитетите за обезбедување на електронски докази и информации во електронска форма со цел поддршка на сите истраги кои што се водат во рамки на инстиуцијата, нагласи Спасовски.
Тој притоа го посочил Секторот за компјутерски криминал и дигитална форензика при МВР како клучен во превенцијата и борбата против овие обици на криминал.
– Независно од низата меѓународни признанија за покажаната ефикасност и професионалност во водењето на истраги како на национално, така и на меѓународно нив, наша цел е континуирано унапредување на капацитетите на овој Сектор во насока на истражување на компјутерскиот криминал, дигиталната форензика, потенцираше Спасовски.
Република Македонија и МВР, додаде, продолжуваат да бидат активен дел од широкиот фронт заедно со нашите соседи и партнерските држави и посебно со ЕУ и нејзините институции, како наш стратешки партнер.
– Со цел постигнување добри резултати во иднина, неопходно е продолжување на соработката во сите наведени сегменти при што посебно ја нагласувам важноста на редовна размена на информации на национално и меѓународно ниво, рече Спасовски соопшти МВР.