Соопштение за јавност за продолжување на конститутивната седница на Собранието

Почитувани,

 

Во врска со продолжување на конститутивната седница на Македонското Собрание, кандидатурата на Талат Џафери за нов Претседател на законодавниот дом, Претседателот на Македонската Алијанса, Ѓорѓија Џорџ Атанасоски, го соопштува следниот став:

 

Македонија се подлабоко тоне во кризата која ги држи граѓаните во масовна хипноза и безнадежност. Поделбата меѓу народот станува се подлабока и за заканува да дојде до точката од која нема назад. Стопанството трпи невидени последици, влогот за враќање во нормала секојдневно расте. Најодговорните Македонски политички партии остануваат глуви на сите апели за Македонско национално помирување. Ниту Албанскиот блок на политички партии нема чувство за своите постапки и барања. Едноставно, сите се заглавени во своите максималистички позиции, Македонскиот народ станува жртва, иднината на Татковината е во заложништво на дневната политика.

 

Спиралата на кризата отиде дотаму што веќе никој не помни зошто беше потпишан политичкиот договор во „Пржино“. Наместо отстранување на сите сомнежи, расчистување на сите обвинувања за наводни изборни нерегуларности и евентуално фалсификување на волјата на гласачите, како и правна разврска на скандалот со прислушувањето, заради непромислените иницијативи и потези на Албанскиот политички фактор, кризата постизборно се измести на еден крајно опасен терен како меѓуетничките односи. Во „Пржино“, ниту еден лидер не превзема обврска да исполнува некаква Тиранска Платформа, која со самото објавување на Божиќ се доживеа како провокација со катастрофални последици за иднината на Татковината.

 

Раздорот во Македонското национално ткиво заедно со внатрешната нестабилност ја прават Татковината лесен плен за старите радикални регионални апетити. Македонските политички партии заслепени од своите нагони за освојување на власта по секоја цена, почнаа да ги жртвуваат националните интереси прифаќајки уцени кои воопшто не го одразуваат вистинскиот однос на политичките сили во Татковината.

 

Македонската Алијанса, во името на целата Македонската Дијаспора, повторно ги повикува најодговорните Македонски политички партии да го запрат сопственото самоуништување, без лични калкулации да се стават во одбрана на суверенитетот и националниот интегритет на нашата заедничка Татковина.

 

Никој не бара од ВМРО ДПМНЕ и СДСМ да почнат безрезервно да се сакаат, уште помалку да си даваат гаранции за обострана амнестија за секој евентуален криминал кој го сторил некој нивен претставник, туку конечно да застанат на страната на Македонскиот народ и да се усогласат барем за прашањата од највисок национален интерес.

 

Прво, заедно да ги отфрлат сите понижувачки и радикални елементи од Тиранската Платформа бидејќи го загрозуваат унитарниот карактер на Македонија, спротивни се со вредностите предвидени во Охридскиот Рамковен Договор и ги поништуваат досегашните придобивки од него.

 

Второ, заедно да побараат од Албанските политички партии од Македонија да се повлечат од Платформата и да покажат дека средбата во Тирана не била смислено сценарио и провокација за нарушување на меѓуетничките односи.

 

Трето, да се усогласат дека никогаш нема да потклекнат пред било каков надворешен или внатрешен притисок, затоа што ниту една политичка партија, ниту еден лидер или политичар во Татковината никогаш нема да се согласи да преговара или разговара за промена или откажување од најсветото Македонско име и идентитет.

 

 

 

МАКЕДОНСКА АЛИЈАНСА

Претседател,

                                                                                 Ѓорѓија Џорџ Атанасоски