Почитувани,

По повод вчерашната посета на Општина Пустец, неформалната средба со Претседателот на Република Албанија, Илир Мета, состанокот со Градоначалникот Едмонд Темелко, кандидатот за пратеник Васил Стерјовски и Министерот за земјоделие Едмонд Панарити, Претседателот на Македонската Алијанса, Ѓорѓија Џорџ Атанасоски, го соопштува следното:

Македонската Алијанса ја оценува како исклучително успешна посетата на Општината Пустец. Претседателот Ѓорѓија Џорџ Атанасоски специјално допатува од САД за да се вклучи во кампањата на Македонската Алијанса за Европска интеграција, да даде целосна поддршка на номинацијата на Васил Стерјовски за пратеник, кој на листата на Движењето за социјалистичка интеграција е на високото петто место и има реална шанса на претстојните парламентарни избори, да стане првиот Македонец кој ќе не претставува во Албанскиот Парламент.

Претседателот на Македонската Алијанса, Ѓорѓија Џорџ Атанасоски имаше прилика да оствари куса, но многу продуктивна средба со ново избраниот Претседател на Албанија, Илир Мета, на која беше договорена идна интензивна соработка на повисоко билатерално ниво, во интерес на остварување на демократските права на Македонците во Албанија.

Во својот говор на собирот на граѓани за промоција на Васил Стерјовски, Претседателот Атанасоски, го изрази своето задоволство што МАЕИ одлучи да коалицира со Движењето за социјалистичка интеграција, партија од каде доаѓа ново избраниот Претседател на Албанија, Илир Мета, кој во изминатиот период покажа дека ги почитува Македонците и ги вреднува барањата за исполнување на основните демократски права и слободи, признавајќи дека во Албанија живеат и работат повеќе од 120 илјади Македонци.

Македонците во Албанија не се и не можат да бидат „мало семејство“, бидејќи не живеат само во Пустец. Нас не има во Голо Брдо, Тирана, Корча, Гора, Мала Преспа и сите останати места во Албанија. Не случајно Албанската Влада ја смени територијалната организација и ги укина другите посебни општини како Голо Брдо и Гора каде е доминантно Македонското население, со што ги спречи нашите браќа и сестри да си изберат свои Градоначалници.

Македонската Алијанса ги повикува најодговорните Македонски политички партии, новото парламентарно мнозинство, новата Влада, да отидат во Пустец и да помогнат на нашите браќа и сестри Македонци. Тоа е нивна должност, бидејќи Татковината мора да се грижи за сите Македонци во светот подеднакво.

Сите имаме обврска да помогнеме да се избере Васил Стерјовски за наш претставник во Албанскиот Парламент. Тоа да биде прв чекор кон поголема факторизација и зголемено политичко влијание на Македонците во Албанија.

Албанските политички фактори од Македонија да побараат Албанија да го признае нашето Уставно име. Да побараат Македонците во Албанија да ги уживаат истите права како Албанското малцинство во Македонија. Да покажат дека не ги интересираат само фотељите во Македонското Собрание и Влада, туку дека знаат да се борат за интересите на нашата заедничка Татковина.

Македонската Алијанса е тука и ќе биде секаде каде Македонците се борат за своите права, се борат да го заштитат Македонскиот национален идентитет и вековно име.

Продолжуваме достоинствено да ги претставуваме нашите браќа и сестри Македонци на секаде во светот!

 

 

 

МАКЕДОНСКА АЛИЈАНСА

Претседател,

                                                                               Ѓорѓија Џорџ Атанасоски