Ние ја поддржуваме Владата да ги фати криминалците но, истовремено, да го "ракува" меѓуетничкиот процес и да го забрза спроведувањето на охридскиот процес - изјавил за "Дневник" генералниот секретар на НАТО, Џорџ Робертсон.

Лидерот на ДУИ, Али Ахмети, на амбасадорите на ЕУ и на НАТО им се жалел дека Црвенковски му го урива рејтингот со тоа што полициската акција во Брест била спроведена без знаење на полициските функционери од Демократската унија за интеграција.

Демократската унија за интеграција преку партискиот лидер Али Ахмети, побарала поддршка од високи претставници на меѓународната заедница во земјава за амнестија на 60 лица. Неофицијално, како што објавија некои медиуми, ДУИ се заложила за повлекување на обвиненијата на заостанатите случаи за кои се водат постапки во судовите.

Министерството за внатрешни работи на Република Македонија ја демантираше веста која ја објави косовскиот информативен центар, во која се вели дека Авдиљ Јакупи-Чакала, еден од водачите на т.н АНА, наводно бил ранет со три куршуми во оружената престрелка со македонските безбедносни сили и дека бил испратен на лекување надвор од земјата, во странство.

Најмалку три непознати напаѓачи на 16 септември, околу 23 часот од автомобил во движење испукале рафал врз полициска патрола кај жичарницата во Тетово, при што нема повредени лица.

Според полициски извори, рафалот е испукан од возило марка „БМВ“, со тетовски регистерски таблички, во кое што имало најмалку три, засега неидентификувани напаѓачи.

Претседателот Борис Трајковски им се налутил на Црвенковски и на Владата, бидејќи не му дозволија тој да го отвори форумот "Македонија во НАТО 2003-2006", па воопшто не се појави на настанот. Од негово име зборуваше советникот за национална безбедност Стево Пендаровски.

Трајковски досега имаше повеќе шанси да ги промовира нашите визии за членство во НАТО, па сметавме дека е добра можност на таа тема да го слушнеме и премиерот, изјави министерот за одбрана Владо Бучковски.

До затворањето на овој број немавме информации дали премиерот Црвенковски се сретнал со претставниците од Одборот на родители.

Владата на премиерот Бранко Црвенковски подготвува отчет за едногодишното владеење, кој ќе биде темпиран некаде околу први ноември. Во отчетот, ќе им биде реферирано на граѓаните што направил досега Црвенковски и кои се неговите следни активности.

Повеќе од 3.000 ученици од сите битолски средни училишта, но и граѓани, на 16 септември, мирно протестираа на плоштадот "Магнолија", од каде што до министерот за образование Азис Положани упатија порака дека ќе продолжат со протестите и бојкот на наставата се додека не добијат писмено известување дека проектот за албанска гимназиска паралелка во Битола се напушта.