МАКЕДОНЦИТЕ ВО СВЕТОТ
Потпишан договор за соработка меѓу Универзитетот во Западна Флорида и македонски организации
МОСТ МЕЃУ МАКЕДОНСКАТА И СЕВЕРНО-АМЕРИКАНСКАТА КУЛТУРА
Пишува: Милева ЛАЗОВА
- Ректорот Кавано од Универзитетот во Западна Флорида, вооодушевен од она што го научи за Македонија, предложи веднаш да се премине на работа и отворено ја изрази својата нестрпливост да ја посети Република Македонија во најскоро време.
- Еден дел од просторот беше посветен на изложбата по повод 100 годишнината од Илинденското востание, а на Катедрата за мултикултура е подготвена едномесечна изложба на македонски артефакти.
Н
а 11 август беше потпишан Договор за образовна и културна соработка на Универ-зитетот во Западна Флорида со македонски организации. Договорот го потпишаа претседателот на невладината организација "Мултилингвална и мултикултурна хармонија" и ректорот на Универзитетот на Западна Флорида, д-р Џон Кавано. Универзитетот на Западна Флорида има 10.000 студенти и се наоѓа во Пенсакола, град со 400.000 жители кој е лоциран во северозападниот дел на Мексиканскиот залив.
Присутните ги поздрави господинот Ѓорѓија - Џорџ Атанасоски, познат македонски бизнисмен во Флорида
По тој повод беше одржана церемонија на која присуствуваа високи гости од Универзитетот и од градот Пенсикола. Најпрво на присутните им се обрати господинот Ѓорѓија - Џорџ Атанасоски, еминентен бизнисмен од Флорида и еден од најуспешните македонски бизнисмени во светот. Во својот говор господинот Атанасоски ја потенцираше взаемната потреба од ваквите проекти и ја пренесе поддршката на македонската дијаспора. Ректорот Кавано му се заблагодари на господинот Атанасоски за говорот и поддршката. Истовремено изрази благодарност до иницијаторите на Проектот, профессор Годфри Франклин и Весна Палмер. Господинот Кавано, вооодушевен од она што го научи за Македонија, предложи веднаш да се премине на работа и отворено ја изрази својата нестрпливост да ја посети Република Македонија во најскоро време.
Овој настан беше искористен за промовирање на Македонија и македонската култура, благодарение на поддршката од
Kolorado Gold, Mikrofleks, Majkal Kloz Dizajan i Rade Jankoski Plaming and hiting и Roleks.
Членовите на ММХ организираа и изложба на дела од македонски уметници
Имено, членовите на ММХ, Менка Клоз, Бети Георгиевска, Љупка Маслова Вирџиниа Грачдани и Весна Палмер организираа изложба во рамките на церемонијата. Изложбата беше поставена во галеријата на Универзитетот. Изложени беа дела од македонските уметници Симеон Силјановски, Томе Серафимовски, Мустафа Асим и Митко Попоски, како и македонскиот уметник од Канада, Мајкл Клоз, и македонската сликарка Кристина Балоски од Индијана. Вклучувањето на уметниците Клоз и Балоски го симболизира мостот на поврзаноста меѓу македонската и северно-американската традиција. Еден дел од просторот беше посветен на изложбата подготвена од Министерството за иселеништво по повод 100 годишнината од Илинденското востание, а на Катедрата за мултикултура направена е едномесечна изложба на македонски артифекти.
Присутните имаа можност да научат нешто повеќе за Македонија и од филмот "Ден во Македонија" кој беше прикажан откако беше потпишан договорот. Филмот ќе биде исто така прикажан на неколку катедри на Универзитетот и во гимназијата во гратчето Голф Бриз.