Американскиот претседател Џорџ Буш, шефот на руската држава Владимир Путин и претседателот на Народна Република Кина, Ху Џинтао, упатија телеграми со честитки до македонскиот претседател Борис Трајковски, по повод едновековниот јубилеј, 100 години Илинден.

Бомба и пиштол биле најдени кај струмичанецот Мирко Христов непосредно пред одржувањето на големиот собир на Мечкин Камен во саботата. Портпаролката на МВР, Мирјана Контевска, го потврди настанот и додаде дека Христов бил приведен и дека му е одредена мерка притвор од триесет дена.

Заводот очекува дека целосната обработка на пописниот материјал од Пописот на населението, домаќинствата и на становите во Република Македонија 2002 ќе заврши до почетокот на ноември.

Директорката на Хигиеноепидемиолошката служба во Тетово, Азизе Велиу, со македонските новинарите комуницира само на албански јазик и препорачува во иднина новинарите кај неа да доаѓаат со преведувачи.

Граѓаните од 27 до 30 години кои не отслужиле воен рок се префрлуваат во резервниот состав на АРМ, соопшти Министерството за одбрана. Сите кои не се евидентирани во воена евиденција, а не се одзвале на повикот за служење воен рок, се самооддалечиле од единица или ја одбегнале воената обврска се должни во следните шест месеци да се јават во подрачните одделенија на Министерството за одбрана.

Пред судењето на најпознатиот македонски макро Дилавер Бојку - Леку, судската палата во Битола е под засилено обезбедување. Битолчани ги одбегнуваат и контејнерите крај коритото на Драгор, плашејќи се приврзаниците на струшкиот макро Бојку да не поставиле експлозивни направи во нив.

Претседателот Борис Трајковски нема да го потпише Указот за прогласување на Законот за изменување на Законот за радиодифузна дејност, донесен од Собранието на 23 јули годинава. Трајковски во писмото упатено до претседателот на Собранието, Никола Поповски, појаснувајќи ги причините за ваквата одлука, нагласува дека Парламентот треба повторно да ги разгледа предложените измени на Законот и да понуди посоодветно решение.

Во здравствените установи во Скопје и во Штип деновиве се испитуваат неколку деца за кои постои сомневање дека се заболени од болеста "кала азар", која од кучињата на човекот може да ја пренесат мушички.

По повод стогодишнината од Илинденското востание, минатиот викенд симболично беше означен стартот на продолжетокот на градбата на црквата "Свети Илија" со богослужба и културно-уметничка програма. Граѓаните можат да донираат доброволни средства со уплата на жиро сметка 300000001725084 МПЦ-"Свети Илија", населба Аеродром - Скопје.