На него се снимени петнаесет песни од кои на тринаесет од нив Мишко е комплетен автор. Преостанатите две кои се со патриотска содржина се обработка од "Кога падна на Пирина" чиј автор е Васка Илиева и "Збогум мајко" која ја интерпретираше Никола Бадев.

Иако поголемиот дел од песните се нови, снимени во последниве неколку месеци, сепак на него се наоѓаат и песни кои се снимени и пред четири години наназад.

Веќе споменавме дека целосен автор на тринаесет песни е Мишко, но како аранжери се појавуваат неколку истакнати музичари. Песните не се снимани во еден период, не се наеднаш снимани како што прават одредени музички имиња.

Станува збор за песни кои се снимени во подолг временски период, така што текстовите се добро "легнати", не се набрзина направени, секоја песна си има посебна содржина, додава Мишко. Посебно внимание посветував на текстовите, бидејќи не сакав да се повторуваат со други песни затоа што е познато во Македонија, а и надвор од неа, дека владее една хипер продукција каде што една песна личи на друга. Се обидував да го избегнам тоа и текстовите да бидат малку поразлични од другите. Претежно се љубовни песни со посентиментални текстови. Некои се автобиографски, а некои да одговараат на нешто што е тренд во дадениот момент.

За Мишко ова не е деби во музиката, иако ова е негов прв носач на звук. Неговите први снимки се реализирани уште пред девет години во 1994 година за продукција на МРТВ.

Јас на почетокот на мојата кариера не сум ни претпоставувал ниту пак сум верувал дека ќе снимам дует со во моментот најпопуларната музичка ѕвезда од фолк музиката, Сузана Спасовска, вели Мишко. Песната е многу трендовска, комплетен автор сум јас, а како солист се појавува виртуозот на саксофон Ферус Мустафов. За таа песна направивме и спот кој веќе една година се врти по електронските медиуми.

Инаку талентот за музика Мишко не го наследил од неговото семејство затоа што никој од нив не се занимавал со музика.

Според Мишко, доколку се соработува со други композитори би чинело неколкукратно повеќе, бидејќи се знае дека една композиција чини од 500 до 1.000 евра, што значи дека 15 композиции по 1.000 евра би чинело 15.000 евра. Но, не се само композиторите во прашање, тука треба да се платат и текстописците, и аранжерите, студијата, оркестрите.

Кога станува збор за фестивалите, ставот на Мишко е дека за да се настапи на еден фестивал не се потребни стотици туку илјадници евра, а при тоа се ризикува пејачот да не влезе во финале.

Морам да кажам дека еднаш имав понуда да настапам на фестивалот "Цветници". Тоа беше во 1996 година, меѓутоа сумата којашто беше потребна за да се настапи на Фестивалот беше екстремно висока што за мои услови беше неизводливо, објаснува Мишко. Но, како што одминуваше времето тежината на фестивалите почна да паѓа, видовме дека "Цветници" веќе не се одржува, така што и кај мене не се појави некоја желба да настапам на некој од нив. Фестивалите ги сметам како приватни фирми за перење на пари каде што однапред се знае кој ќе настапи и ќе победи, однапред се знае кој колку ќе заработи. Немам намера да бидам нечиј декор. Но, ова не значи дека во иднина нема да настапам на некој фестивал. Во 1996 година настапив на Фестивалот на Коста Наумовски "Турбо фолк". Не настапив со турбо песна, туку со автентична македонска песна насловена како "Дано, Данице". Сум имал понуди да настапувам и на популарно кажано тезги, меѓутоа не сум ги прифатил. Не сакам да претерам и со моите настапи по медиумите, затоа што мојата професија сепак е новинарството. Не личи човек кој се занимава со сериозна професија особено политичко новинарство, да го има насекаде. Музиката ми доаѓа како релаксација од главоболките предизвикани од новинарската професија.