По повод црковно-народниот празник Свети Петар и Павле, во месноста Петачко Водиче, на половина километар над тетовското село Беловиште, беше извршено осветување и полагање камен-темелник на нова црква што ќе го носи името "Св. Јован Крстител".

Веќе неколку месеци по Конгресот, СДСМ не може да ги избере новите раководства во општинските разграноци поради несогласувања меѓу централното раководство и членството во врска со кадровските решенија. Без локални лидери се уште се околу 20 од 124 општински организации, меѓу кои и познатите "бастиони" на социјалдемократите - Битола, Охрид, Куманово.

Битолската судијка Лидија Мијакова ќе го води судскиот процес против Дилавер Бојку - Леку од струшкото село Велешта. Покрај четирите обвинителни акти што веќе пристигнале во битолскиот суд најавени се и нови - за недозволена трговија со бело робје, за фалсификување исправи, како и за бегство од затвор.

Александар Стојановски, потпреседател на Федерација на македонските фармери, вели дека ако до септември државата не преземе нешто за откупот и за плаќање на пченицата по 10 денари за килограм, со протести ќе го спречат увозот на бесцаринска пченка од 150.000 тони. Иста е состојбата во преостанатите сегменти од земјоделството.

Македонското овчо и козјо сирење, кашкавалот и македонското јагне од наредната година треба да се најдат на американскиот пазар. Со сите дегустации на нашите производи што се направени од страна на специјализираните продавници за овие простори во САД, побарувачката е потврдена и сега само треба да се направи мрежа и да се освои пазарот, се вели во соопштението на Министерството за економија.

Луѓето од регионот на Преспа велат дека никогаш до сега во поновата историја не се случи ниту толкаво опаѓање на нивото на водата во Преспанското Езеро, ниту пак толкав негов пораст во периодот од само шест-седум месеци. Имено, еминентни авторитети предлагаат да се регулира одливот на вода од Преспанското Езеро во Охридското Езеро и на тој начин да му се врати сјајот на преспанскиот бисер.

Германската агенција за техничка помош - ГТЗ со ракламна кампања и со наградна игра ќе ги стимулира жителите на Општина Сарај редовно да ги плаќаат сметките за потрошената вода и за комуналните услуги.

Директорката на Драмскиот театар во Скопје, Лилјана Велјановска, неодамна ги отвори картите и ги кажа имињата и презимињата на луѓето кои направиле долгови во театарот. Меѓу нив се најде и поранешниот директор Сенко Велинов. За една година од директорувањето долгот го направил со земање кредит од Стопанска банка, неплатени комуналии, со долг кон автопревозници и кон една рекламна агенција.

Од 11 до 13 јули годинава во организација на Македонската православна црковна општина "Свети Кирил и Методиј" се одржа тринаесеттиот македонски етнички фестивал на којшто се претстави Македонската заедница во Бафало. На фестивалот продефилираа традиционалната македонска храна, музика и ора.

На фестивалот настапија повеќе македонски групи и културно-уметнички друштва од Канада и Соединетите Американски Држави.
Средствата собрани за време на одржувањето на Фестивалот се наменети за Фондот за градба на црква.

Во саботата со фанфари, фестивалски оган и со популарната Бетовенова симфонија "Ода на радоста" во Античкиот театар свечено беше отворено 43. издание на Охридско лето. Популарната Бетовенова симфонија ја изведоа Македонската филхармонија, Хорот на МНТ..., а како солисти настапија Весна Гиновска – Илкова и гости од Бугарија.