Во организација на здружените македонски радио програми "Т’га за Југ", "Македонска Лоза" и "Радио Ѓердан", под раководство на Џон и Бети Треноски, а по покана на невладините организации од Македонија, здружението на граѓани "Климентов завет", дел од македонските естрадни уметници од Австралија ќе земат учество на културните настани во Македонија по повод одбележувањето на 100 годишнината од Илинденското востание.

Како резултат на политичкиот договор за водење отворен, конструктивен и искрен дијалог за повеќе клучни стратешки прашања, на неодамнешната средба помеѓу СДСМ и ВМРО-ДПМНЕ се разговараше и се разменија ставови и мислења по прашањата на безбедносната ситуација во Република Македонија, територијалната поделба и функционирањето на правната држава и владеењето на правото. Беше констатирано дека заштитата на територијалниот интегритет на државата е врвен и заеднички приоритет. Во таа смисла се укажа на потребата од продолжување на реформите и преструктуирање на безбедносниот сектор како предуслов за поуспешно остварување на стратегиските цели на Република Македонија - одбрана и контрола на својата територија, како и зачленување во НАТО.

Двата државни универзитета, скопскиот и битолскиот, како и Универзитетот на Југоисточна Европа, ќе формираат работни групи кои ќе изготват програми со конкретни мерки за откривање случаи на корупција и непотизам. "Добро е што универзитетите ја прифатија улогата дека самите треба да преземат нешто за да ги исчистат своите редови", потенцираше претседателката на Комисијата, Слаѓана Тасева.

Полицијата поднесе посебен извештај против Војо Михајловски за сторено кривично дело злоупотреба на службената должност и овластување. Во декември 2001 и во јануари 2000 година во својство на директор наредил на фабриката да & се исплати за наводно потрошен медицински материјал во износ од 22.502.305 долари.

Две непознати лица во околината на Чегране извршиле разбојништво врз дваесет и седумгодиншниот А.Х од Тетово додека тој со такси автомобил од Тетово одел за Гостивар. Разбојнците со закана со пиштол од оштетениот А.Х. зеле 738 илјади денари, по што избегале во непознат правец.

Оваа производна година, според досегашните проценки на теренот, ќе имаме за 20 отсто помалку тутун од планираните количества пропишани од страна на Министерстовото за земјоделство, шумарство и водостопанство. Тутунарите предупредуваат дека може да дојде до изумирање на тутунопроизводството доколку продолжи владината политика на неподдршка на овој сектор.

На Филозофскиот факултет се случи голема збрка кога кандидатите за запишување требало да го полагаат вториот дел од приемниот испит. Кандидатите пријавени за една студиска група добиле тестови наменети за други катедри. Така на кандидатите за студии по историја им биле поделени тестови по психологија.

Неодамна започнаа реконструкциските зафати за обнова на Лешочкиот манастир, кој беше разурнат за време на воените конфликти во земјава. Разурнатиот храм ќе го реконструира стручен тим од Републичкиот завод за заштита на спомениците на културата, а овој Проект е финансиран од Европската агенција за реконструкција, кој изнесува 391.000 евра.

Мегаѕвездата Тоше Проески ќе биде нашиот претставник на "Избор за песна на Евровизија" што ќе се одржи во Турција идната година. Според зборовите на генералната директорка на МРТВ, Гордана Стошиќ, изборот на Тоше е резултат на неговите успеси во и надвор од земјата. Тоше истакна дека ќе даде се од себе достојно да не претставува во Турција.

"Канадски пошти" ќе ја тужат македонската Влада ако го раскине Договорот за заедничко оперирање со "Македонска пошта". Канаѓаните бараат Владата да одлучи дали го прифаќа договорот потпишан лани во јули, а ревидиран пред два месеца.